Дар Осорхонаи миллии Тоҷикистон намоиши мусаввирони асрҳои 16 ва 18-и Аврупои ғарбӣ ифтитоҳ гардид

ДУШАНБЕ, 12.01.2022 /АМИТ «Ховар»/. Имрӯз дар Осорхонаи миллии Тоҷикистон шоҳкориҳои мусаввирони асрҳои 16 ва 18-и Аврупои ғарбӣ, ки дар фонди осорхона нигоҳдорӣ мешаванд, манзури  тамошобинон  гардонида  шуданд, иттилоъ дод ба АМИТ «Ховар» сухангӯи Осорхонаи миллии Тоҷикистон Фаридун Кенҷаев.

Ин асарҳо марбут ба асрҳои 16 ва 18 буда, аз ҷониби рассомони машҳури кишварҳои Фаронса, Италия, Олмон ва Ҳолланд офарида шудаанд.

Асарҳои мазкур солҳои 50-уми асри 20 аз Осорхонаи давлатии ба номи А. Пушкин баҳри ғанӣ намудани фонди Осорхонаи санъати тасвирӣ, ки навбунёд буд, ба шаҳриДушанбе фиристода шуда буданд. Давоми ин муддат онҳо дар фонди Осорхонаи миллии Тоҷикистон ҳифз ва баъзеи онҳо аз ҷониби мутахассисони муассиса тармим гардида, имрӯз манзури тамошобинон  гардиданд.

Дар намоиш асарҳои Дунтсе И.Б. «Яхмолакбозӣ», Швендт К. «Соҳил», Вербукҳовен Э.Ҷ. «Гӯсфандҳо», Френтсел О. «Пода дар домана», Маттиас Ш. «Дар саҳна», Иоганн Б.Л. «Симои зан», Амберг В.А. «Симои зани италиявӣ», Солие П.А. «Маҳбуб», Изер Ҳ. «Симои пирамарди номанавис», Жан-Лоран М. «Симои рассом Виолэ», Беллини Ҷ. «Азодорӣ» (нусхаи Лохов Н.Н.), Рафаэл С. «Олиҳа бо ниқоби тӯрин» (Хоби Исо) нусха, Эйферт В.А. «Манзара бо ғарамзор», Пик А. «Осиёб», инчунин аз муаллифони номаълум «Симои зан», «Эрот бо кабӯтарон», «Мубаллиғон» ва «Натюморт» пешниҳоди тамошобинон гардонида шудаанд.

Намоиши мазкур ба тамошобинон имкон медиҳад, ки бо шоҳкориҳои мусаввирони асрҳои 16 ва 18-и Аврупои ғарбӣ аз наздик шинос шуда, тавассути тамошои асарҳои офаридаи онҳо ҷаҳони маънавии худро ғанӣ намоянд.

Ёдовар мешавем, ки намоиши мазкур   то 28 феврал идома меёбад.

АКСҲО аз Осорхонаи миллии Тоҷикистон