Чин миёни кишварҳои сармоягузор ба Тоҷикистон пешсаф аст

ДУШАНБЕ, 11.02.2022 /АМИТ «Ховар»/. Дар соли сипаригардида ба иқтисодиёти Тоҷикистон беш аз 700 миллион доллари амрикоӣ сармояи хориҷӣ ворид гардидааст, ки аз он 340 миллион долларро сармояи мустақим ва 370 миллион долларро дигар намуди сармояҳо ташкил медиҳад.

Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода имрӯз дар нишасти матбуотӣ ба хабарнигорон гуфт, ки воридоти сармояи хориҷӣ нисбат ба соли 2020 тамоюли афзоиш дошта, дар маҷмӯъ зиёдшавӣ ба маблағи беш аз 280 миллион доллар ё 1,7 маротиба, аз ҷумла сармояи мустақим 179,7 миллион доллар ва дигар намуди сармояҳо беш аз 110,6 миллион долларро ташкил медихад.

Дар воридоти сармоя ба Тоҷикистон Чин пешсаф буда, бо 236 миллион доллар сармояи мустақим зинаи аввалро ишғол менамояд. Эрон бо 32 миллион доллар дар зинаи дуюм, Туркия ва Фаронса бо 25 миллион доллар дар мақоми сеюм қарор доранд.

Ҳамзамон ҳаҷми сармояи вориднамудаи Швейтсария ба Тоҷикистон 21 миллион доллар, Кипр 10 миллион доллар ва Британияи Кабир 6 миллион долларро ташкил медиҳад.

Дар маҷмӯъ, соли гузшта 35 давлати ҷаҳон ба Тоҷикистон сармоя ворид намудаанд.

Саъдӣ Қодирзода афзуд, ки сармояҳои мустақими воридгардида маҷмуан ба соҳаҳои истихроҷи маъдан -56,9 фоиз, саноати коркард- 9,9 фоиз, сохтмон- 2,1 фоиз ва ба дигар соҳаҳо 31,1 фоиз равона карда шудаанд.

АКС: АМИТ «Ховар»