Дар Ашт майдончаи варзишӣ ва синфхонаҳои иловагӣ бунёд гардиданд

ДУШАНБЕ, 14.02.2022 /АМИТ «Ховар»/. Дар Ҷамоати деҳоти Ориёни ноҳияи Ашт майдончаи варзишӣ, ки  аз ҷониби соҳибкори маҳаллӣ Талаб Каримов бо харҷи 200 ҳазор сомонӣ бунёд шуда, барои футболи хурд пешбинӣ шудааст, мавриди истифода қарор гирифт.

Дар ифтитоҳи он  Раиси вилояти Суғд Раҷаббой Аҳмадзода  иштирок намуда, бунёди чунин иншоотро барои рушди соҳаи варзиш ва тарбияи ҷисмонӣ муҳиму саривақтӣ арзёбӣ карда, гуфт, ки наврасону ҷавонон бояд аз имконияти мавҷуда пурсамар истифода баранд.

Мавриди зикр аст, ки дар ноҳия се мактаби варзишӣ ва даҳҳо толору майдончаҳои варзишӣ фаъолият дошта, ҷалби ҳарчӣ бештари аҳолӣ ба варзиш мувофиқи мақсад мебошад.

Дар ҳамин ҷамоат синфхонаҳои иловагии муассисаи таҳсилоти миёнаи умумии рақами 63 ба истифода дода шуданд. Бунёди синфхонаҳои иловагӣ моҳи июни соли 2021 оғоз гардида, бо дастгирии мақомоти иҷроияи маҳаллӣ ва дастгирии соҳибкорону саховатмандон бо харҷи 100 ҳазор сомонӣ чор синфхонаи нав сохта шуд.

Раиси вилоят иқдоми соҳибкорон ва сокинони ҷамоатро шоистаи пайравӣ унвон намуда, иброз дошт, ки бо дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи маориф диққати махсус дода мешавад. Дар доираи амалишавии нақшаву тадбирҳои судманд ҳамасола дар вилоят даҳҳо биноҳои нави таълимӣ сохта мешаванд.

Дар зимн супориш дода шуд, ки ба таълиму тарбияи насли наврас, азхудкунии касбу ҳунар ва забономӯзии хонандагон таваҷҷуҳи хосса зоҳир карда шавад.

АКСҲО: Хадамоти матбуоти Раиси в. Суғд