Кормандони соҳаи тиб бо борхалтаҳои тиббӣ таъмин гардиданд

ДУШАНБЕ, 01.02.2022 /АМИТ «Ховар»/. Дар Ҷумҳурии Тоҷикистон ба кормандони муассисаҳои давлатии таълимӣ дар самти тибби оилавӣ борхалтаҳои тиббӣ дастрас гардид, ки дар онҳо таҷҳизоти зарурӣ барои расонидани ёрии таъҷилии тиббию санитарӣ ва ташхиси аввалин мавҷуданд, иттилоъ доданд ба АМИТ «Ховар» аз маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон.

Ҳадаф аз иқдоми мазкур беҳтар намудани сифати хизматрасонии тиббӣ ва заминаи моддию техникӣ дар шабакаи муассисаҳои кумаки аввалини тиббию санитарӣ мебошад.

Борхалтаҳои тиббӣ ба Муассисаи давлатии «Маркази ҷумҳуриявии таълимию клиникии тибби оилавӣ» ва зерсохторҳои он дар вилоятҳои Хатлону Суғд ва Вилояти Мухтори Кӯҳистони Бадахшон, кафедраи тибби оилавии Муассисаи давлатии таълимии «Донишкадаи таҳсилоти баъдидипломии кормандони соҳаи тандурустии Ҷумҳурии Тоҷикистон» дар заминаи Маркази саломатии шаҳрии №1 дар шаҳри Душанбе дастрас карда шуданд.

АКС аз Вазорати тандурустӣ ва ҳифзи иҷтимоии аҳолии ҶТ