НИШАСТИ МАТБУОТӢ. Порсол дар Тоҷикистон беш аз 300 корхонаю коргоҳҳои нави саноатӣ ба истифода дода шуданд

ДУШАНБЕ, 02.02.2022/АМИТ «Ховар»/. Дар Тоҷикистон соли гузашта  новобаста ба пандемия беш аз сесад корхонаю коргоҳҳои нави саноатӣ ба истифода дода шуданд, ки дар онҳо зиёда аз панҷ ҳазору сад нафар  сокинони кишвар бо ҷойи кор таъмин гардиданд. Аз  ҳама бештар корхонаю коргоҳҳо дар шимоли Тоҷикистон-вилояти Суғд- 124 адад, дар Хатлон- 86 адад, навоҳии тобеи ҷумҳурӣ- 61 адад, шаҳри Душанбе- 26 адад ва дар Бадахшон 12 адад мавриди баҳрабардорӣ қарор дода шудаанд.

Ин маълумотро Вазири саноат ва технологияҳои нави ҷумҳурӣ Шералӣ Кабир  имрӯз дар ҷараёни нишасти матбуотӣ ба таваҷҷуҳи намояндагони расонаҳои хабарӣ дар Душанбе  расонида, илова намуд, ки аз сесаду нуҳ корхонаю коргоҳе, ки соли гузашта дар ҷумҳурӣ ба истифода дода шуданд, 90 ададашон дар соҳаи саноати сабук, 82 корхона дар соҳаи саноати хӯрокворӣ, 76 корхонаву коргоҳ дар соҳаи масолеҳи сохтмон,  42 корхонаю коргоҳ дар соҳаи мошинсозӣ ва чор корхона дар саноати ангишт фаъолият мебаранд.

Мавриди зикр аст, ки теъдоди корхонаю коргоҳҳое, ки соли гузашта бунёд гардидаанд, дар қиёс ба  як соли пеш  41 адад ва ҷойҳои корӣ  беш аз 1400 ҷой зиёд аст.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёмашон ба Парлумони мамлакат моҳи декабри соли гузашта солҳои 2022-2026-ро  Солҳои рушди саноат дар Тоҷикистон эълон намуданд. Дар иртибот ба ин, Вазири  саноат ва технологияҳои нави ҷумҳурӣ иброз намуд, ки эълон  гардидани Солҳои рушди саноат дар Ҷумҳурии Тоҷикистон  дар назди  саноатчиёни кишвар дар  самти  руши саноати мамлакат, ки яке аз чор ҳадафи стратегии Ҳукумати Ҷумҳурии Тоҷикистон мебошад, масъулияти бузург  мегузорад.

    АКСҲО: АМИТ «Ховар»