САДОҚАТ БА ВАТАН-САДОҚАТ БА МОДАР. Шуҷоату мардонагӣ, дӯст доштани Ватан ва ҳифзи меҳани аҷдодиро маҳз модарон меомӯзанд
ДУШАНБЕ, 23.02.2022 /АМИТ «Ховар»/. Нақши занону бонувон дар баробари бунёди оилаи хушбахт ва ба воя расонидани фарзандони баору номус, инчунин дар тарбияи афсарону сарбозони шуҷоъ ниҳоят муҳиму арзишманд мебошад. Ин матлабро дар арафаи таҷлили 29-умин солгарди таъсиси Қувваҳои Мусаллаҳи Ҷумҳурии Тоҷикистон сардори Раёсати сабти асноди ҳолати шаҳрвандии Вазорати адлияи Ҷумҳурии Тоҷикистон, полковник Саодатбибӣ СИРОҶЗОДА ба хабарнигори АМИТ «Ховар» иброз дошт.
Ба андешаи Саодатбибӣ Сироҷзода, вазъияти зудтағйирёбандаи ҷаҳони муосир, зиёд гардидани равияву созмонҳои террористиву экстремистӣ ва дигар зуҳуроти таҳдидовари хатарнок ҳар яки мо, аз ҷумла бонувону занонро ҳушдор медиҳад, ки зиракии сиёсӣ, омодагии доимӣ, эҳсоси баланди ватандӯстӣ, худогоҳӣ ва муқаддас доштану ҳифз намудани арзишҳои истиқлоли давлатиро аз даст надиҳем. Зеро ин зуҳуроти хатарнок метавонад сулҳу субот ва ҳаёти орому осудаи мардумони кишвари моро халалдор намояд.
Таърих гувоҳ аст, ки бонувону модарони тоҷик дар қатори мардон ва дар баъзе ҳолатҳо ҷойгузини онҳо шуда, анъанаҳои ҳарбию ватандӯстии халқамонро сарбаландона идома дода, марзу буми Ватанро ҳимоя кардаанд. Корнамоиву далерии занони тоҷик дар замони сангини Ҷанги дуюми ҷаҳон (1941-1945) ҳам дар ҷабҳа ва ҳам дар ақибгоҳ шоистаи ситоишу таҳсин аст.
Имрӯз низ занони тоҷик роҳи пуршарафу боифтихори Рухшонаю Гурдофарид ва Таҳминаро идома дода, дар ҷузъу томҳои низомии мамлакат ва мақомоти қудративу ҳифзи ҳуқуқ фаъолияти пурсамар доранд.
Тибқи маълумоти оморӣ, имрӯз дар сохтори Қувваҳои Мусаллаҳи Тоҷикистон тақрибан 1219 нафар занон ба ҳайси хизматчиёни ҳарбӣ, давлатӣ ва техникӣ фаъолият мекунанд.
Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон аз садоқат ва иштироки фаъолонаи занҳо дар чорабиниҳои муҳими сиёсию низомӣ борҳо изҳори қаноатмандӣ намудаанд. Аз ҷумла, Сарвари давлат зимни суханронии хеш бахшида ба 25-солагии таъсиси Гвардияи миллӣ чунин иброз намуданд: “Имрӯз дар сохторҳои низомӣ ва мақомоти ҳифзи ҳуқуқи кишвар садҳо нафар, аз ҷумла дар Гвардияи миллӣ қариб 100 нафар бонувон ба иҷрои вазифаю уҳдадориҳои ҳарбӣ машғуланд, ки 34 нафари онҳо вазифаҳои роҳбарикунандаро ишғол мекунанд. Фаъолияти онҳо дар самти корҳои тарбиявӣ, коргузорӣ, кор бо кадрҳо, хизматрасонии тиббӣ, алоқа ва хадамоти ақибгоҳ хеле назаррас мебошад. Дар паради имрӯзаи идона бонувон-хизматчиёни ҳарбии ҷузъу томҳои гуногуни Қувваҳои Мусаллаҳ, аз ҷумла Гвардияи миллӣ иштирок мекунанд, ки ин нишонаи возеҳи садоқат ба Ватан ва давлати соҳибистиқлоли Тоҷикистон мебошад”.
Саодатбибӣ Сироҷзода мегӯяд, ки давоми 30 соли соҳибистиқлолӣ бо ташаббус ва дастгирии бевоситаи Пешвои миллат муҳтарам Эмомалӣ Раҳмон дар самти баланд бардоштани нақши занону бонувон дар ҷомеа тадбирҳои муҳим амалӣ шуданд.
Мояи ифтихор аст, ки бори аввал дар таърихи соҳибистиқлолии кишвар дар арафаи ҷашни 30-солагии Истиқлоли давлатӣ нахустин зан- Сардори Хадамоти иҷрои назди Ҳукумати Ҷумҳурии Тоҷикистон Барно Саидвализода бо рутбаи баланди “генерал-майори милитсия” мушарраф гардид. Ин дар баробари ифтихор масъулияти бонувони тоҷикро зиёд мекунад.
Бо боварӣ метавон гуфт, ки зиёд шудани шумораи занҳо дар ҳайати Қувваҳои Мусаллаҳи мамлакат ба рӯҳбаландӣ ва ҷалби ҷавонон ба ин соҳаи пурифтихор мусоидат мекунад. Зеро занону модарон дар ин самт таҷрибаи калон доранд. Онҳо аз овони кӯдакӣ бо меҳру муҳаббати беандоза ба фарзандон шуҷоату мардонагӣ меомӯзанд. Дар дили онҳо дӯст доштани Ватан-Модар ва ҳифз кардани меҳани аҷдодиро мепарваранд. Ватан низ монанди Модар аз фарзанди худ танҳо дӯстдорӣ, ҳимоят, муҳофизат, садоқат ва хидмат талаб мекунад.
«Имрӯз бонувону занони тоҷик дар тамоми ҷабҳаҳои зиндагӣ ба дастовардҳои назаррас ноил гаштаанд ва бе муҳобот дар тарбияи афсарону сарбозони шуҷою далер низ ба комёбиҳо ноил мегарданд.
Албатта, барои зан хизмат кардан дар сафи артиш осон набуда, он душворию махсусияти хешро дорад. Вале новобаста аз ин, боварӣ дорем, ки занону бонувони тоҷик аз уҳдаи ин кори мушкил ва пурифтихор сарбаландона мебароянд ва бо қувваю неруи дучанд баҳри баланд бардоштани мақом ва обрӯю эътибори Артиши миллӣ кӯшиш ба харҷ медиҳанд»,-гуфт дар анҷоми суҳбат Саодатбибӣ Сироҷзода.
Назокат ҚОДИРЗОДА,
АМИТ «Ховар»
АКСҲО: АМИТ «Ховар»
ТАҒЙИРЁБИИ ИҚЛИМ. Гармшавии бесобиқаи ҳаво, афзудани таркиби озони атмосфера ва ба амал омадани офатҳои гуногуни табиӣ аз нишонаҳои он аст
ЭЪТИРОФИ СИЁСАТИ ОЯНДАБИНИИ ПЕШВОИ МИЛЛАТ АЗ ҶОНИБИ ҶОМЕАИ ҶАҲОНӢ. Мулоҳизаҳои ходими адабии АМИТ «Ховар» дар ин хусус
Антониу Гутерриш: «Тоҷикистон дар самти пешгирии обшавии босуръати пиряхҳо шарики қавӣ ва боэътимоди Созмони Милали Муттаҳид аст»
Эмомалӣ Раҳмон: «Чин бузургтарин сармоягузори мо ба ҳисоб меравад»
Муносибатҳои Чин ва Тоҷикистон: Ба хотири ояндаи дурахшон
Эмомалӣ Раҳмон: «Ваҳдати миллӣ дар баробари Истиқлоли давлатӣ як рукни муҳимми давлатдорӣ ва шарти аслии пешрафту шукуфоии Тоҷикистон мебошад»
Президенти Тоҷикистон: «Сулҳи тоҷиконро ҳамчун нодиртарин роҳи хотима гузоштан ба мухолифатҳои мусаллаҳона эътироф кардаанд»
Пешвои миллат: «Хишти аввали бинои сулҳу ваҳдати миллӣ дар Иҷлосияи XVI Шурои Олӣ гузошта шуда буд»
Эмомалӣ Раҳмон: «Созишномаи сулҳ ва ваҳдати миллӣ барои халқи Тоҷикистон пайки шодӣ, паёми оромӣ ва номаи иқболу саодат гардид»
«МАН БА МАРДУМИ ТОҶИК ҲАВАС МЕБАРАМ, КИ ДАР ЧУНИН ТАБИАТИ ЗЕБО УМР БА САР МЕБАРАНД…». Таассуроти меҳмонон ва иштирокдорони Конфронси сеюми оби Душанбе аз тамошои манзараҳои Тоҷикистон
ИҚДОМҲОИ ПРЕЗИДЕНТИ ТОҶИКИСТОН ҶОМЕАИ ҶАҲОНРО БА ҲАМ ОВАРД! Таассуроти меҳмонон ва иштирокдорони Конфронси сеюми оби Душанбе аз тамошои дараи Ромит
