ДАРАХТИ ДӮСТӢ. Дар Душанбе доир ба ҳифзи муҳити зист аксия баргузор гардид

Март 14, 2022 11:26

ДУШАНБЕ, 14.03.2022 /АМИТ «Ховар»/. Рӯзи шанбе, 12 март Дафтари Швейтсария оид ба ҳамкорӣ дар Тоҷикистон дар ҳамкорӣ бо Ҳукумати Тоҷикистон дар чаҳорчӯби вокуниш ба мушкилоти ҷаҳонии тағйирёбии иқлим дар Душанбе барои ҳифзи муҳити зист аксия доир намуд. Чорабинӣ ба 30-юмин солгарди барқарории равобити дипломатӣ миёни Тоҷикистон ва Швейтсария бахшида шуд. Ҳудуди 300 дарахт аз ҷониби ҳукумати Швейтсария тавассути Хазинаи Оғохон  ХАБИТАТ  (AKAH) харидорӣ шудааст, то дар боғи назди кӯли Ҷавонони пойтахт шинонида шаванд.

Мутахассисони Мақомоти иҷроияи ҳокимияти давлатии шаҳри Душанбе ва Кумитаи ҳифзи муҳити зисти назди Ҳукумати Ҷумҳурии Тоҷикистон дарахтони мувофиқро интихоб намуда, барои шинонидан майдон ҷудо карданд. Дар аксия беш аз 150 волонтёр аз намояндагии Дафтари Швейтсария оид ба ҳамкорӣ дар Тоҷикистон, Вазорати корҳои хориҷӣ, мақомоти иҷроияи ҳокимияти давлатии шаҳри Душанбе, Кумитаи ҳифзи муҳити зисти назди Ҳукумати Ҷумҳурии Тоҷикистон ва шарикони татбиқи лоиҳа иштирок намуданд.

Дар давраи пандемия бисёр фаъолияти иҷтимоӣ коҳиш ёфтанд ва ин чорабинӣ паёми мусбат хоҳад буд, то аён гардад, ки ғамхорӣ доир ба муҳити зист  ва шинондани ниҳолҳои нав барои ояндаи сабзу устувор ҳанӯз ҳам муҳим аст. Сабзу хуррам гаронидани шаҳр яке аз вазифаҳои муҳим доир ба устуворӣ мебошад, ки ба сокинон ва наслҳои оянда манфиат меоварад. Дарахтҳо ҳаворо тоза ва зарраҳои зарароварро маҳв месозанд, ифлосшавии ҳаворо кам мекунанд, сояро таъмин намуда, гармиро дар шаҳрҳо маҳдуд мекунанд.

Зимни суханронии ифтитоҳӣ муовини роҳбари Дафтари Швейтсария оид ба ҳамкорӣ дар Ҷумҳурии Тоҷикистон Ричард Шеневар зикр намуд, ки «таҷлили солгарди муносибатҳои дипломатӣ миёни Ҷумҳурии Тоҷикистон ва Швейтсария аз шинонидани дарахтон оғоз шуд, ки чун рамзи тақвияти муносибатҳои (решаҳои) пурсамар  ва ҳамкории ду кишвар дар замони муосир хеле муҳим аст».

«Ин амали нек на танҳо ба беҳбуди вазъи экологӣ, санитарию гигиенӣ, муҳити зист, ташаккули ҳавои тоза ва беҳбуди аҳолӣ таъсири мусбат мерасонад, балки ба таҳкими дӯстии байни кишварҳо ва халқҳоямон низ мусоидат мекунад.

«Тавре ки Ҳофизи Шерозии бузургвор фармудааст: «Дарахти дӯстӣ биншон, ки коми дил ба бор орад…», — иброз намуд раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода.


Мавриди зикр аст, ки тӯли 25 соли ахир Швейтсария ба ҳукумат ва мардуми Тоҷикистон ҳудуди 500 миллион доллари амрикоӣ  грант  (кумаки бебозгашт) ҷудо кардааст. Тавассути барномаи ҳамкорӣ барои Осиёи Марказӣ (солҳои 2022-2025) Швейтсария ба дастгирии рушди иқтисодӣ, иҷтимоӣ ва демократӣ, пешбурди равиши ҳамгироӣ ва минтақавӣ дар соҳаи мураккаби идоракунии обҳои фаромарзӣ, таҳкими робитаҳои иқтисодӣ ва пешбурди идоракунии хуб тамаркуз менамояд.

 

АКС: Кумитаи ҳифзи муҳити зисти назди Ҳукумати ҶТ

Март 14, 2022 11:26

Хабарҳои дигари ин бахш

Дар Душанбе даври дуюми Озмуни ҷумҳуриявии «Нонпазӣ ва маҳсулоти нонӣ, қаннодӣ, ҳалвопазӣ, шириниҳои миллӣ ва муосир» доир карда мешавад
Раиси шаҳри Душанбе Рустами Эмомалӣ бо Ҳокими шаҳри Остона Женис Касимбек мулоқот намуданд
Дар Душанбе шумораи умумии воситаҳои нақлиёти мусофирбар 20 фоиз зиёд карда мешавад
Рустами Эмомалӣ: «80 фоизи таълимгирандагони таълимоти ғайриқонунии диниро ҷавонони то 30-сола ташкил медиҳанд»
Рустами Эмомалӣ: «Корҳо дар самти пешгирӣ ва коҳиш додани сатҳи амалҳои коррупсионӣ бояд тақвият дода шаванд»
Имрӯз таҳти роҳбарии Раиси шаҳри Душанбе Рустами Эмомалӣ ҷаласаи назоратӣ бо кормандони мақомоти ҳифзи ҳуқуқи пойтахт баргузор гардид
Раиси шаҳри Душанбе Рустами Эмомалӣ муассисаи таҳсилоти томактабии «Афрӯза»-ро мавриди истифода қарор доданд
Ғолибони даври шаҳрии озмунҳои «Беҳтарин ҳамсар» ва «Фарзанд – боғи падару модар» ба даври ҷумҳуриявӣ роҳ ёфтанд
Мақомоти шаҳри Душанбе шартномаи хариди 30 электробусро ба имзо расонид
Ҷаласаи кумитаи тадорукоти «Намоишгоҳи байналмилалии сайёҳии Душанбе» доир гардид
Ҳамкории Душанбе бо Фландрияи Шоҳигарии Белгия тақвияти бештар меёбад
Дар шаҳраку маҳаллаҳои ноҳияҳои Душанбе озмунҳои «Беҳтарин ҳамсар» ва «Фарзанд – боғи падару модар» гузаронида шуданд