Тоҷикистон ва UNHCR масоили марбут ба Афғонистонро муҳокима карданд

ДУШАНБЕ, 18.03.2022 /НИАТ «Ховар»/. 17 март мулоқоти Вазири корҳои хориҷии Ҷумҳурии Тоҷикистон  Сироҷиддин Муҳриддин бо Комиссари Олии Созмони Милалии Муттаҳид оид ба паноҳандагон (UNHCR) Филиппо Грандӣ, ки бо сафари корӣ дар Душанбе қарор дорад, баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар вохӯрӣ ҷонибҳо дар бораи самтҳои муҳими ҳамкории Тоҷикистон бо UNHCR, аз ҷумла мусоидат ба паноҳандагон, масоили марбут ба Афғонистон ва дигар масъалаҳои мавриди эҳтимоми муштарак табодули назар карданд.

Тавре  2 феврал зимни нишасти матбуотӣ Вазири корҳои хориҷии мамлакат Сироҷиддин Муҳриддин зикр намуд, имрӯз дар қаламрави Тоҷикистон 3 ҳазор оилаи афғон, дар маҷмӯъ ҳудуди 15 ҳазор гурезагон ба сар мебаранд. Дар давраи нооромӣ дар Афғонистони ҳамсоя Тоҷикистон қаламрави худро ба шарикони хориҷӣ барои фиристодани шаҳрвандони хориҷӣ ва шаҳрвандони Афғонистон ба кишварҳои сеюм пешниҳод намуда буд.

АКС: ВКХ ҶТ