«АЗ ДУШАНБЕ ТО СЕУЛ». Ба шарафи 30-солагии барқарории муносибатҳои дипломатӣ миёни Тоҷикистон ва Корея ҳамоиши фарҳангӣ доир мегардад

Апрель 19, 2022 15:03

ДУШАНБЕ, 19.04.2022 /АМИТ «Ховар»/. Имсол аз барқарории муносибатҳои дипломатӣ миёни Ҷумҳурии Тоҷикистон ва Ҷумҳурии Корея 30 сол сипарӣ мегардад. Барои сазовор таҷлил намудани ин рӯйдоди муҳим дар баробари чорабиниҳои зиёд 26 апрел, соати 18:00 бо ташаббуси Сафорати Ҷумҳурии Корея дар Ҷумҳурии Тоҷикистон дар Кохи «Борбад» консерти анъанавии кореягӣ таҳти унвони «Аз Душанбе то Сеул» баргузор мегардад.

Тавре дар Сафорати Ҷумҳурии Корея дар Ҷумҳурии Тоҷикистон ба АМИТ «Ховар» хабар доданд, дар ҳамоиши фарҳангӣ мусиқӣ ва рақсҳои анъанавии кореягӣ пешниҳоди дӯстдорони олами зебои санъату ҳунар гардонида мешаванд.

Хотиррасон мешавем, ки муносибатҳои дипломатӣ миёни Ҷумҳурии Тоҷикистон ва Ҷумҳурии Корея 27 апрели соли 1992 барқарор гардидаанд. Сафорати Ҷумҳурии Тоҷикистон дар Ҷумҳурии Корея моҳи апрели соли 2015   ва Сафорати Ҷумҳурии Корея дар Ҷумҳурии Тоҷикистон дар сатҳи Кордор соли 2008 ифтитоҳ ёфтааанд.  Заминаи шартномавӣ-ҳуқуқии ду кишварро 9 созишномаи байниҳукуматӣ ташкил медиҳанд. Баҳри таҳкими муносибатҳои Ҷумҳурии Корея бо минтақаи Осиёи Марказӣ “Форуми ҳамкорӣ байни Ҷумҳурии Корея ва давлатҳои Осиёи Марказӣ” аз соли  2007 фаъолият мекунад, ки барои рушди муносибатҳои дуҷонибаи Тоҷикистону Корея аҳамияти зиёд дорад. Ҳамасола дар рафти Форуми мазкур мавзӯъҳои мухталифи ҳамкорӣ баррасӣ мегарданд.  Намояндаи доимии Палатаи савдо ва саноати Ҷумҳурии Тоҷикистон аз моҳи апрели соли  2017 инҷониб дар Ҷумҳурии Корея фаъолият мекунад.  Ҷумҳурии Тоҷикистон дар барномаҳои мухталифи Агентии ҳамкории байналмилалии Корея (KOIСА) иштирок мекунад.

Ёдовар мешавем, ки 16 марти соли 2022 Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҷараёни ирсоли барқияи табрикӣ ба унвони Президенти тозаинтихоби Ҷумҳурии Корея муҳтарам Юн Сок Ёл,  ин кишварро  аз ҷумлаи шарикони муҳими Тоҷикистон дар арсаи байналмилалӣ номида, изҳор доштанд, ки «кишвари Шумо дар қатори аввалинҳо соҳибистиқлолии Ҷумҳурии Тоҷикистонро ба расмият шинохт ва соли равон мо 30-солагии истиқрори муносибатҳои дипломатиамонро, ки ба 27 апрел рост меояд, ҷашн мегирем. Бо изҳори қаноатмандӣ аз сатҳу муҳтавои кунунии муносибатҳои дӯстӣ ва ҳамкории гуногунҷанбаи Тоҷикистон ва Корея омодагии инҷонибро ҷиҳати густариши минбаъдаи онҳо дар ҳама арсаҳои мавриди таваҷҷуҳи тарафайн иброз менамоям. Бовар дорам, ки бо саъю талошҳои муштараки ҷонибҳо робитаҳои ҳасанаи ду кишвари ба ҳам дӯст минбаъд низ дар маҷрои рушду тавсеа идомаи нек пайдо карда, натиҷаҳои самарабахш ба бор хоҳанд овард».

АКС: Сафорати ҶК дар ҶТ

Апрель 19, 2022 15:03

Хабарҳои дигари ин бахш

Президенти Муғулистон бо сафари давлатӣ ба Ҷумҳурии Тоҷикистон ташриф меорад
Сарвазири Тоҷикистон бо Вазири иқтисод ва сайёҳии Амороти Муттаҳидаи Араб мулоқот намуд
Дар Тянҷин мулоқоти вазирони корҳои хориҷии Тоҷикистон ва Чин баргузор гардид
Сафири Тоҷикистон бо мудири кулли Фонди кувайтии рушди иқтисодии араб мулоқот намуд
Дар Давҳа машваратҳои сиёсӣ байни вазоратҳои корҳои хориҷии Тоҷикистон ва Қатар баргузор гардиданд
Сироҷиддин Муҳриддин дар ҷаласаи Шурои вазирони корҳои хориҷии давлатҳои аъзои Созмони ҳамкории Шанхай иштирок намуд
Густариши робитаҳои молиявии Тоҷикистон ва Қатар мавриди муҳокима қарор гирифт
Байни мақомоти стандартизатсияи Тоҷикистон ва Узбекистон «Харитаи роҳ» омода карда мешавад
Ҳамкорӣ байни Тоҷикистон ва Узбекистон дар соҳаи таҳсилоти томактабӣ ва миёнаи умумӣ баррасӣ гардид
Сафири Тоҷикистон бо раиси Агентии маълумот ва зеҳни сунъии Арабистони Саудӣ мулоқот намуд
Сафири Тоҷикистон бо роҳбари Институти дипломатии Кувайт ба номи Сауд Ан-Носир Ас-Сабоҳ мулоқот намуд
Хуттали Қадим ба Феҳристи мероси ҷаҳонии ЮНЕСКО ворид гардид