Дар Душанбе ҳамкорӣ миёни Тоҷикистон ва ширкати «Genesis BBQ Group»-и Ҷумҳурии Корея баррасӣ гардид

Апрель 30, 2022 10:35

ДУШАНБЕ, 30.04.2022 /АМИТ «Ховар»/. 29 апрел мулоқоти муовини Вазири корҳои хориҷии Ҷумҳурии Тоҷикистон Шараф Шерализода бо роҳбари ширкати «Genesis BBQ Group»-и Ҷумҳурии Корея Уоррен Юн, ки дар Душанбе қарор дорад, баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар мулоқот ҷонибҳо масоили ба роҳ мондани ҳамкорӣ миёни Тоҷикистон ва ширкати «Genesis BBQ Group»-и Ҷумҳурии Корея мавриди баррасӣ қарор доданд ва доир ба дигар масъалаҳои мавриди эҳтимоли тарафайн табодули назар карданд.

Тавре қаблан АМИТ «Ховар» хабар дода буд, 27 апрел миёни Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Корея муҳтарам Мун Чжэ Ин ба муносибати 30-юмин солгарди барпо намудани робитаҳои дипломатии ду кишвар мубодилаи барқияҳои табрикӣ ба амал омад.

Дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Президенти Ҷумҳурии Корея муҳтарам Мун Чжэ Ин омадааст:

«Ҷаноби Олӣ,

Табрикоти  самимӣ ва таманниёти неки ин ҷонибро ба муносибати 30-солагии истиқрори муносибатҳои дипломатӣ миёни Ҷумҳурии Тоҷикистон ва Ҷумҳурии Корея лутфан бипазиред.

Боиси қаноатмандист, ки тайи ин давра муносибатҳои дӯстӣ ва ҳамкориҳои судманди кишварҳои мо арсаҳои мухталифи мавриди таваҷҷуҳи тарафайнро фаро гирифта, имрӯз дар марҳилаи рушди устувори худ қарор доранд.

Ҷониби Тоҷикистон хоҳони вусъати тоза бахшидан ба ин раванд буда, омода аст, ки ҷиҳати таҳкиму тавсеаи робитаҳои гуногунҷанбаи ду ҷониб дар ҳама соҳаҳои ҷавобгӯ ба манфиатҳои аслии ду давлат минбаъд ҳам кӯшишҳои пайвастаи муштарак ба харҷ диҳад.

Бовар дорам, ки идомаи анъанаҳои неки муколамаи сиёсӣ дар сатҳҳои мухталиф ва татбиқи пайгиронаи мувофиқаҳои дар ин роҳ қаблан бадастомада аз ин баъд низ натиҷаҳои самарабахш ба бор хоҳанд овард.

Бо истифода аз  фурсати фараҳманд ба Шумо, Ҷаноби Олӣ, сиҳатии комилу саодатмандӣ ва дар пешбурди фаъолияти пурмасъулиятатон комёбиҳои нав ба нав, ба мардуми дӯсти Ҷумҳурии Корея пешрафту шукуфоии рӯзафзун орзумандам».

Дар барқияи табрикии Президенти Ҷумҳурии Корея муҳтарам Мун Чжэ Ин ба унвони Президенти Ҷумҳурии Тоҷикистон муҳтарам Эмомалӣ Раҳмон, чунин гуфта шудааст:

«Муҳтарам Ҷаноби Олӣ,

Ба муносибати 30-солагии истиқрори муносибатҳои дипломатӣ миёни Ҷумҳурии Корея ва Ҷумҳурии Тоҷикистон ба Шумо, ҷаноби Президент ва халқи тоҷик саломи дӯстонаамро мерасонам.

Баъди барқарории муносибатҳои дипломатӣ дар санаи 27 апрели соли 1992 робитаҳои ду кишвар дар соҳаҳои сиёсӣ, иқтисодӣ, фарҳангӣ, мубодилаи инсонӣ ва дигар соҳаҳо мунтазам рушд ёфта истодаанд. Барои ман махсусан хурсандиовар аст, ки ба туфайли ифтитоҳи сафорати Ҷумҳурии Корея дар Ҷумҳурии Тоҷикистон дар соли гузашта барои тақвияти муносибатҳои ҳамкории ҳарду кишвар заминаи мусоид муҳайё гардидааст.

Умедворам, ки ба шарофати 30-солагии муносибатҳои дипломатӣ ҳамкориҳои судманди ҳарду кишвар дар бахшҳои мухталиф тавсеа ёфта, ҳамдигарфаҳмӣ ва дӯстии байни  мардумонамон дар заминаи баргузории чорабиниҳои гуногунсатҳ боз ҳам амиқтар мешаванд.

Ҷаноби Президент, ба Шумо саломатии комилу некӯаҳволӣ ва рушди беканори кишваратонро орзумандам».

Акс: ВКХ ҶТ

Апрель 30, 2022 10:35

Хабарҳои дигари ин бахш

Хуттали Қадим ба Феҳристи мероси ҷаҳонии ЮНЕСКО ворид гардид
Сироҷиддин Муҳриддин бо роҳбарияти Дафтари Швейтсария оид ба ҳамкорӣ мулоқот намуд
Дар Душанбе Муколамаи сатҳи баланд оид ба сиёсат ва амният байни Иттиҳоди Аврупо ва Осиёи Марказӣ баргузор гашт
Дар Душанбе тавофуқоти ҳосилшуда зимни нахустин Саммити Осиёи Марказӣ ва Иттиҳоди Аврупо баррасӣ гардид
Дар Остона намоиши молу маҳсулоти кишоварзӣ ва саноатии Тоҷикистон баргузор мегардад
Сафири Тоҷикистон бо роҳбарияти Федератсияи палатаҳои тиҷоратии Арабистони Саудӣ мулоқот намуд
Дар Токио машваратҳои сиёсии байниидоравии Тоҷикистон ва Ҷопон баргузор гардиданд
Дар Теҳрон масъалаҳои консулӣ байни Тоҷикистон ва Эрон баррасӣ шуданд
Сарвазири Ҷумҳурии Тоҷикистон Қоҳир Расулзода бо Президенти Ҷумҳурии Қирғизистон Садир Жапаров мулоқот намуд
Намояндаи Тоҷикистон дар ҳафтумин Иҷлосияи махсуси мавзуӣ оид ба об ва офатҳои табиӣ иштирок намуд
Ҳайати Тоҷикистон дар иҷлосияи 47-уми Кумитаи мероси ҷаҳонии ЮНЕСКО иштирок дорад
Фаррух Шарифзода бо муовини парлумонии Вазири корҳои хориҷии Ҷопон мулоқот намуд