БОКС. Имрӯз дар шаҳри Истанбул Чемпионати ҷаҳон миёни бонувон оғоз мешавад

ДУШАНБЕ, 06.05.2022 /АМИТ «Ховар»/. Имрӯз дар шаҳри Истанбули Туркия Чемпионати ҷаҳон оид ба бокс миёни бонувон оғоз мешавад, ки то 21 май идома ёфта, дар он 4 муштзанбонуи тоҷик иштирок мекунанд, хабар медиҳад шореҳи варзиши АМИТ «Ховар» бо истинод ба Федератсияи бокси Тоҷикистон.

Аз аввалин чемпионати ҷаҳон миёни бонувон 20 сол сипарӣ шуда, сол то сол шумораи иштирокчиён меафзояд. Дар мусобиқаи Истанбул иштироки 419 варзишгар аз 93 давлати дунё дар назар аст.

Ҷумҳурии Тоҷикистонро дар ин мусобиқаи бонфуз 4 варзишгар — Сумайя Қосимова (-48кг), Руҳафзо Ҳақназарова (-50кг), Миҷгона Самадова (-57кг) ва Шоира Зулқайнарова (-63кг) намояндагӣ мекунанд. Онҳоро дар ин сафар сармураббӣ Мирзо Шамсиев роҳбарӣ менамояд.

Қабл аз чемпионат варзишгарон дар Ҷумҳурии Узбекистон ба ҷамъомади машқӣ-таълимӣ фаро гирифта шуданд.

Хотиррасон мешавем, ки Чемпионати ҷаҳон аз рӯи 11 вазн сурат гирифта, фонди ҷоизавии он 2,4 миллион долларро ташкил медиҳад. Дар ҳар вазн ғолибону ҷоизадорон ҳамон маблағеро мегиранд, ки мардҳо дар чемпионати ҷаҳон-2021 гирифта буданд:

Ҷои 1: 100000 доллари ИМА;

Ҷои 2: 50000 доллари ИМА;

Ҷои 3: 25000 доллари ИМА;

Ҷои 3: 25000 доллари ИМА.

Дар Чемпионати ҷаҳон оид ба бокс миёни бонувон Тоҷикистон як медал дорад. Соли 2012 дар Синхуандаои Чин варзишгари маъруфи кишвар Мавзуна Чориева медали биринҷӣ ба даст оварда буд.

Дар доираи чемпионат ҳамчунин Конгресси ғайринавбатии Ассотсиатсияи байналмилалии бокс баргузор мегардад, ки дар он президенти ассотсиатсия ва аъзои Шӯрои директорони ассотсиатсия интихоб мегарданд. Ба вазифаи президенти Ассотсиатсияи байналмилалии бокс номзадии ду нафар – Умар Кремлев (Русия) ва Борис ван дер Ворст (Нидерланд) пешниҳод шудааст.

АКС: КМО Тоҷикистон