Дар доираи ташаббуси нави ҲХДТ «Роҳ ба сӯи маориф» якумин «Соати сиёсӣ» доир гардид

ДУШАНБЕ, 03.05.2022 /АМИТ «Ховар»/. Дар доираи амалиёти муштараки «Роҳ ба сӯи маориф» дар тамоми муассисаҳои таълимии вилояти Хатлон дар мавзӯъҳои “Тарбияи ҳарбӣ-ватандӯстии ҷавонон ва ҳувияти миллӣ”, “Вазъи бавуҷудомада дар ҳамсоякишвар — Афғонистон ва таҳдидҳои он ба Тоҷикистон ва ҷаҳон” ва “Фишангҳои муқовимат бо гурӯҳҳои ифротӣ” ташаббуси ҳизбӣ- “Соати сиёсӣ» доир гардид. Аз ҷумла, 30 апрел дар муассисаи таҳсилоти миёнаи умумии рақами 7-и шаҳри Бохтар ин иқдом бо иштироки раиси Кумитаи иҷроияи Ҳизби Халқии Демократии Тоҷикистон дар вилояти Хатлон Қиёмиддин Миралиён баргузор шуд, хабар доданд аз шуъбаи иттилоот ва матбуоти КИ ҲХДТ дар вилояти Хатлон ба АМИТ «Ховар».

«Амалиёти муштараки “Соати сиёсӣ” омили бедории зеҳнии наврасону ҷавонон ба ҳисоб рафта, дар кори шинос гардонидани насли ҷавон бо равандҳои сиёсиву иҷтимоӣ ҷиҳати аз бар намудани асосҳои сиёсати давлат, пуштибонӣ аз арзишҳои миллату давлатдорӣ дар ташаккули афкори наврасону ҷавонон нақши муассир мегузорад», — иброз дошт раиси Кумита.

Мақсад аз гузаронидани амалиёти мазкур- баланд бардоштани маърифати сиёсии наврасон ва ҷавонони 12-24 сола, тарбияи онҳо дар рӯҳияи ватандӯстӣ, худшиносӣ ва ҳувияти миллӣ мебошад.

Ёдовар мешавем, ки нақшаи амалиёти муштараки Ҳизби Халқии Демократии Тоҷикистон ва Вазорати маориф ва илми Ҷумҳурии Тоҷикистон оид ба таҳкими низоми таълиму тарбия дар муассисаҳои таълимӣ таҳти унвони “Роҳ ба сӯи маориф” аз ташаббусҳои Кумитаи иҷроияи ҲХДТ дар вилояти Хатлон буда, 20 апрел бо иштироки масъулини кумитаҳои иҷроияи ҳизбии шаҳру ноҳияҳои вилояти Хатлон ва мудирони маорифи шаҳру ноҳияҳои вилоят муаррифӣ гардид. Дар доираи он ду ташаббус – “Соати сиёсӣ” ва “Мактаби ман” мунтазам доир мегарданд.

Ташаббуси мазкур дар ҳошияи дастуру ҳидоятҳои Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон зимни мулоқот бо фаъолони вилояти Хатлон (24.02.2022) ва дастурҳои Пешвои миллат дар доираи Паёми навбатӣ ба Маҷлиси Олии Ҷумҳурии Тоҷикистон (21.12.2021) ҳамчун идомаи ташаббускориҳо ҷиҳати таҳкими низоми таълиму тарбия дар муассисаҳои таълимии ҳудуди вилояти Хатлон ба роҳ монда шуд.

АКС аз КИ ҲХДТ дар вилояти Хатлон