ДУШАНБЕ, 17.05.2022 /АМИТ «Ховар»/. Бо иқдоми Кумитаи рушди сайёҳии назди Ҳукумати Ҷумҳурии Тоҷикистон дар доираи ҳамкорӣ бо шарикони рушд аз ҷониби Агентии Туркия оид ба ҳамкории байналмилалӣ (ТИКА) дар Литсейи хизмат ва туризми шаҳри Душанбе Лоиҳаи таъсиси маркази таълимӣ ва татбиқи ошпазӣ ва қаннодӣ оғоз гардид, хабар доданд ба АМИТ «Ховар» дар кумитаи мазкур.

Дар маросими оғози кори лоиҳа роҳбарияти Кумита ва Дафтари ТИКА дар Душанбе иштирок намуданд.

Литсейи хизмат ва туризми шаҳри Душанбе фаъолияти худро дар соҳаи сайёҳӣ аз соли 2008 ба роҳ монда, имрӯзҳо аз рӯи ихтисосҳои “Туроператор”, “Турагент”, “Роҳбалад”, “Ошпаз-қаннод”, “Ошпази таомҳои хориҷӣ”, “Низоми компютерӣ ва интернет- технология”, “Ҳисобдор бо донистани компютер”, “Фурӯшанда-ташкилотчӣ” ва “Назоратчӣ-фурӯшанда” мутахассис омода месозад.

Дар Литсей хонандагон дар заминаи синфи 11 як сол ва дар заминаи синфи 9 ду сол таҳсил менамоянд.

Ҳоло дар муассисаи таълимии мазкур 500 нафар таҳсил намуда, ҳамасола онро зиёда за 200 нафар бо ихтисосҳои “Туроператор”, “Турагент”, “Роҳбалад”, “Ошпаз-қаннод”, “Ошпази таомҳои хориҷӣ”, “Системаи компютерӣ ва интернет технология”, “Ҳисобдор бо донистани компютер”, “Фурӯшанда-ташкилотчӣ” ва “Назоратчӣ-фурӯшанда” хатм менамоянд.

Яке аз масъалаҳои муҳими рушди соҳаи сайёҳӣ- таъмини мутахассисони соҳибтаҷриба дар иншооти қабулу хизматрасонӣ мебошад. Амалишавии Лоиҳаи таъсиси маркази таълимӣ ва татбиқи ошпазию қаннодӣ ба босифат гузаронидани машғулияти дарсӣ ва омода кардани кадрҳои ихтисосманд мусоидат менамояд.

Тарбияи мутахассисони ботаҷрибаю касбӣ ва пешниҳоди хизматрасонии сатҳи байналмилалӣ яке аз ҳадафҳои Стратегияи рушди сайёҳӣ дар Ҷумҳурии Тоҷикистон барои давраи то соли 2030 ҷиҳати таъмини рушди устувори соҳаи сайёҳии кишвар ба ҳисоб меравад.

АКС: Кумитаи рушди сайёҳии назди Ҳукумати Ҷумҳурии Тоҷикистон