Дар Рашт ба 80 нафар кӯдакон аз оилаҳои ниёзманд шаҳодатномаи таваллуд тақдим карда шуд

Май 29, 2022 09:57

ДУШАНБЕ, 29.05.2022 /АМИТ «Ховар»/. Бахшида ба Рӯзи байналмилалии ҳифзи кӯдакон бо ташаббуси бахши Сабти асноди ҳолати шаҳрвандии (САҲШ) ноҳияи Рашт дар ҷамоати шаҳраки Навобод ҳамоиши идонаи фарҳангӣ-маърифатӣ баргузор гардид, ки дар он ба 80 нафар кӯдакон аз оилаҳои ниёзманд ба таври ройгон шаҳодатномаи таваллуд тақдим гардид, иттилоъ медиҳад мухбири минтақавии АМИТ «Ховар» Субҳониддини МАҲМУД.

Дар ҳамоиши мазкур намояндагон, меҳмонон, зиёда аз 200 нафар падарону модарон ва ҷавонону фаъолони ҷамоат иштирок намуданд. Мудири бахши САҲШ-и ноҳияи Рашт Нилуфар Мирзозода зикр кард, ки кӯдакон ояндаи осудаву ободи ҳар як миллат, сарвати бебаҳои ҳар як оила, ҷомеа ва давлат ба шумор мераванд ва онҳо бахту саодати рӯзгори ҳар як падару модар мебошанд. «Зеро ба дунё омадани тифл дар ҳар як оила хушбахтиву иқболи нек меорад ва чун зангӯлаи идомаи ҳаёт садо медиҳад. Аз ин рӯ, Рӯзи байналмилалии ҳифзи кӯдакон 62 сол муқаддам бо қарори Анҷумани Шӯрои федератсияи байналмилалии демократии занон таъсис ёфта, бори аввал соли 1950 дар даҳҳо кишвари дунё таҷлил гардида буд», — гуфт ӯ.

Инчунин мавсуф илова намуд, ки ин ҷашн ба калонсолон ҳамеша ҳушдор медиҳад, ки масъулияти саломатӣ, тарбияи маънавии кӯдакону наврасон, фароҳам овардани шароити мусоиди таълиму тарбияи онҳо дар мактаб ва оила, инкишофи эҷодиёти бачагон ва тайёр намудани онҳо ба зиндагии оянда ба дӯши онҳост.

«Мо онҳоро бояд дӯст дорем ва меҳру муҳаббати худро дар вуҷуди поки кӯдакон ҷой диҳем», — тазаккур дод Нилуфар Мирзозода.

Тибқи иттилои масъулини бахши САҲШ-и ноҳияи мазкур,  соли равон дар ҷамоатҳои шаҳраку деҳоти Навобод, Тагоба, Боқӣ Раҳимзода, Нусратулло Махсум ва Аскалон ба зиёда аз 350 нафар кӯдакон оилаҳои камбизоате, ки муҳлати саривақт гирифтани шаҳодатномаи тавалудашон гузаштааст ва волидайни онҳо имконияти супоридани ҳаққи хизматрасонии шаҳодатномаро надоранд, шаҳодатномаи ройгон дода шуд.

АКС: САҲШ-и ноҳияи Рашт

Май 29, 2022 09:57

Хабарҳои дигари ин бахш

Фестивали чоруми дӯстии ҷавонони шаҳри Душанбе баргузор гардид
«БАЧА АЗИЗ, ОДОБАШ АЗ ОН АЗИЗТАР…». Ба таълиму тарбияи фарзандон набояд бетарафӣ зоҳир намуд
Маркази тадқиқоти стратегии Тоҷикистон ва Институти байналмилалии Осиёи Марказӣ масоили ҳамкории илмию таҳлилиро баррасӣ намуданд
35-СОЛАГИИ ИСТИҚЛОЛИ ДАВЛАТӢ. Беморхонаи марказии ноҳияи Темурмалик пурра навсозӣ гардид
ЗАБОН ДОНӢ-ҶАҲОН ДОНӢ. Аз 1 апрел кормандони мақомоти давлатӣ, худидоракунии маҳаллӣ ва ташкилотҳои давлатӣ ба омӯзиши ҳатмии забонҳои хориҷӣ фаро гирифта мешаванд
Дар ноҳияи Айнӣ сеюмин ҳамоиши гирандагони стипендияи президентӣ баргузор шуд
НАВРӮЗИ ХУҶАСТАПАЙ МУЖДАИ НЕКИ БАҲОРИ ХУРРАМ. Дар Суғд Ҷашни байналмилалии Наврӯз бо шукуҳи хоса таҷлил шуд
Тоҷикистон терроризму ифротгароиро қотеона маҳкум менамояд
24 МАРТ — РӮЗИ ҶАҲОНИИ МУБОРИЗА БО БЕМОРИИ СИЛ. Ҳадаф аз он огоҳӣ, пешгирӣ ва мубориза бар зидди ин беморӣ мебошад
ИМРӮЗ ДАР ТОҶИКИСТОН — РӮЗИ ГУЛ ВА НИҲОЛШИНОНӢ. Соли 2023 дар ҷумҳурӣ беш аз 1 миллион бех ниҳоли дарахтони гуногун шинонида шуд
МАСЛИҲАТИ МУТАХАССИС. Истеъмоли гулкарам масунияти инсонро боло мебардорад
МАСЛИҲАТИ МУТАХАССИС. Истеъмоли ғизои солим беҳтарин роҳи ҳифзи солимии шахс мебошад