ДАР АФҒОНИСТОН БОЗ МУСИБАТ. Бар асари заминларза беш аз ҳазор нафар ба ҳалокат расиданд, СММ аз ҷомеаи ҷаҳонӣ даъват кард, ки дар робита ба фоҷеа ба ин кишвар кумак намоянд

ДУШАНБЕ, 23.06.2022 /АМИТ «Ховар»/. Дабири кулли Созмони Милали Муттаҳид Антониу Гутерриш аз ҷомеаи ҷаҳонӣ даъват кард, ки ба Афғонистон дар рафъи оқибатҳои заминларза кумак намоянд. Тавре АМИТ «Ховар» бо истинод ба ТАСС хабар медиҳад, дар ин бора дар изҳороти Дабири кулл, ки дирӯз, 22 июн мунташир гардид, гуфта мешавад.

«Мо аз ҷомеаи ҷаҳонӣ умед дорем, ки ба садҳо оилаҳои аз ин офати табиӣ осебдида кумак мерасонад. Вақти он расидааст, ки ҳамраъйӣ нишон диҳем», — гуфт ӯ.

Гутерриш зикр кард, ки кормандони СММ дар маҳал вазъро арзёбӣ менамоянд ва ёрии таъҷилӣ мерасонанд. Дабири кулли СММ ҳамчунин ба наздикони қурбониёни ҳодиса изҳори ҳамдардии амиқ намуд.

Шаби 22 июн дар вилоятҳои Пактико, Хуст, Лағмон, Ғазнӣ, Логар ва Кобули Афғонистон заминларзаи шиддатнокиаш 6,1 рух дод. Тавре агентии «Bakhtar» хабар медихад, 1000 нафар ба ҳалокат расида, 1500 кас маҷрӯҳ шуданд. Мақомоти маҳаллӣ бар онанд, ки эҳтимол шумораи қурбониён ва захмиён зиёд шавад.

Роҳбарияти ҳаракати «Толибон»* ҷудо намудани 1,1 миллион доллари ИМА-ро барои кумак ба осебдидагони заминларза тасдиқ карда, дастур дод, ки барои интиқоли осебдидагон ва расонидани озуқа, сару либос, лавозимоти тиббӣ ва ашёи ниёзи аввал ба ҷои ҳодиса тамоми нақлиёти ҳавоӣ ва заминӣ истифода бурда шавад.

__________________

*Толибон» — ҳаракати террористии мамнуъ дар Тоҷикистон ва дигар кишварҳо

АКС аз манбаъҳои боз