Дар фазои боронии Данғара ва Ваҳдат 18 мушаки «Алазан-6» партоб шуд

ДУШАНБЕ, 13.06.2022 /АМИТ «Ховар»/. 11 июн Хадамоти зидди жолаи Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бо партоби 18 мушаки «Алазан-6», 5 ҳолати резиши жола дар ноҳияи Данғара ва шаҳри Ваҳдатро барҳам зад, хабар медиҳад АМИТ «Ховар» бо истинод ба КҲФ ва МГ.

Бино ба гузориши Хадамоти зидди жола, аз соати 13:53 то 14:34 дақиқа дар фазои боронии ноҳияи Данғара 12 мушаки «Алазан» партоб шуд ва аз резиши жола дар 3 минтақа пешгирӣ ба амал оварданд.

Инчунин аз соати 13:32 то 16:05 дақиқа партоби 6 адад мушаки навъи «Алазан-6» 2 минтақаи жоларез дар шаҳри Ваҳдатро безарар намуд.

Партоби мушакҳо садҳо гектар заминҳои кишти зироатҳои кишоварзиро аз хатар наҷот дод.

Мавриди зикр аст, ки ҳамасола бо мақсади ҳифзи зироати кишоварзӣ ва боғу токзори мамлакат дар минтақаҳо зидди жола садҳо мушак истифода мешавад. Бориши жола маъмулан барои зироати кишоварзӣ зарари калон меорад.

Истифода аз мушакҳои зиддижола имкон фароҳам меорад, ки хатари мазкур бартараф карда шавад.

Акс: КҲФ ва МГ