Дар шаҳри Конибодом бахшида ба Рӯзи Ваҳдати миллӣ мулоқот доир шуд

Июнь 3, 2022 15:17

ДУШАНБЕ, 03.06.2022 /АМИТ «Ховар»/.  Дар доираи сафари корӣ ба вилояти Суғд бахшида ба 25-умин солгарди Рӯзи Ваҳдати миллӣ дар шаҳри Конибодоми вилояти Суғд мулоқоти Раиси Федератсияи иттифоқҳои касабаи мустақили Тоҷикистон Маликшо Неъматзода бо сокинони гуногункасб, масъулини мақомоти иҷроия, омӯзгорону толибилмони муассисаҳои таълимии ноҳия, ҷавонон, варзишгарон, гирандагони стипендияҳои Президенти Ҷумҳурии Тоҷикистон, ғолибони озмунҳои ҷумҳуриявӣ ва собиқадорони меҳнат баргузор гардид. Дар ин бора ба АМИТ «Ховар» дар Федератсияи иттифоқҳои касабаи мустақили Тоҷикистон хабар доданд.

Маликшо Неъматзода таваҷҷуҳи ҳозиринро ба муҳимияти ин санаи таърихӣ ҷалб намуда, иброз дошт, ки «маҳз  Созишномаи истиқрори сулҳ ва ризоияти миллӣ, ки 27 июни соли 1997 дар шаҳри Москва ба имзо расид, тоҷиконро ба ваҳдату якдигарфаҳмӣ расонид ва сабаби хомӯш гардидани ҷанги хонумонсӯзи шаҳрвандӣ гардид. Маҳз сулҳу ваҳдат ва ҳамдигарфаҳмӣ истиқлоли ҷавони моро аз хатарҳои ҷиддӣ раҳоӣ бахшида, роҳро ба сӯи давлатсозии миллӣ ва созандагию бунёдкорӣ боз намуд».

Тазаккур дода шуд, ки маҳз ҷонбозиҳо ва идроки баланди фарзанди сарсупурдаи миллат- Президенти Ҷумҳурии Тоҷикистон муҳтарам Эмомалӣ Раҳмон барои расидан ба ин рӯзгори ором ва зиндагии осоишта созгор гардид ва мардуми шарафмандамон ҳар сол Рӯзи Ваҳдати миллиро бо тантана ҷашн гирифта, ба хубӣ эҳсос мекунанд, ки ваҳдат ва истиқлол ду маҳфуми аз ҳам ҷудонашаванда мебошанд. Аз ин лиҳоз халқи бузурги мо ба қадри сулҳу ваҳдат ва истиқлолу озодӣ ба хубӣ мерасанд ва ба он арҷ мегузоранд.

Таъмин намудани сулҳу оромӣ, суботи сиёсӣ ва ваҳдати миллӣ, аз Иҷлосияи XVI Шӯрои Олии мамлакат сарчашма мегирад, ки имсол ба баргузории он 30 сол пур мешавад.

Зимни мулоқот гирандагони стипендияҳои  президентӣ ва ғолибони озмуни “Фурӯғи субҳи доноӣ китоб аст” ба Пешвои миллат барои ғамхориҳои ҳамешагӣ, дастгирии сиёсати давлатии ҷавонон, илму маориф ва баргузории озмунҳои ҷумҳуриявӣ изҳори сипос карданд.

Ёдовар мешавем, ки 27 июни соли 1997 миёни тоҷикон Созишномаи умумии истиқрори сулҳ ва ризоияти миллӣ ба имзо расид, ки ба даргириҳои дохилии панҷсола амалан хотима бахшид ва раванди ташаккули таҳаввулоти минбаъдаи мамлакатро дигаргун намуд.

 Акс: ФИКМТ

Июнь 3, 2022 15:17

Хабарҳои дигари ин бахш

Ширкати IRS: Барои таъмини бехатарии роҳ 34 тонна ранг ва 8 тонна саққочаи ҷилодиҳанда сарф хоҳад шуд
ИҚДОМИ МОДАРОН. Бахшида ба Рӯзи Ваҳдати миллӣ онҳо ба дидорбинии сарҳадбонон рафтанд
АРЗҲОИ ДӮСТӢ. Дар Хуҷанд Вохӯрӣ-Мулоқоти занони Тоҷикистон ва Чин доир мешавад
МАСЛИҲАТИ МУТАХАССИС. Истеъмоли тарбуз организмро аз нурҳои ултрабунафш ҳимоя мекунад
Беморхонаи марказии шаҳри Турсунзода аз таъмири асосӣ бароварда шуд
Витаминҳо барои организми инсон чӣ аҳамият доранд?
Пешвои миллат: «Эҳтироми падару модар ва ба ҷо овардани хизмати онҳо беҳтарин савоб ва ба қавли бузургон баробар ба ҳаҷ кардан аст»
МАСЛИҲАТИ МУТАХАССИС. Истеъмоли зардолу камхуниро бартараф месозад
То Истиқлолияти давлатӣ дар Тоҷикистон ҳамагӣ 17 масҷид фаъолият дошта, шумораи онҳо имрӯз ба беш аз 4 ҳазор расидааст
Сарвари давлат: «То имрӯз беш аз 255 ҳазор шаҳрванди Тоҷикистон ҳаҷи фарзӣ ва зиёда аз 400 ҳазор умраро ба ҷо овардаанд»
Гурӯҳи кории шаҳри Душанбе бо сокинони ноҳияи Варзоб вохӯрии судманд баргузор намуд
Дар Душанбе ҷаласаи 3-юми аъзои Гурӯҳи кории бисёрҷониба барои баррасии Харитаи роҳ доир гардид