Мулоқоту музокироти сатҳи олии Тоҷикистон ва Узбекистон

Июнь 2, 2022 18:37

ДУШАНБЕ, 02.06.2022 /АМИТ «Ховар»/. Баррасии масоили дӯстию ҳамкории Тоҷикистон ва Узбекистон дар мулоқоти хоссаи Сарони давлатҳо оғоз гардида, сипас дар вохӯрии ҳайатҳои васеи ҳарду ҷониб идома ёфт.

Дар ҷараёни мулоқоти сарони давлатҳои Тоҷикистон ва Узбекистон муҳтарам Эмомалӣ Раҳмон ва муҳтарам Шавкат Мирзиёев масъалаҳои таҳкими робитаҳо дар соҳаҳои калидии ҳамкории дуҷониба баррасӣ гардиданд. Сарони ду давлат ҳамчунин ба таври муфассал оид ба масъалаҳои мубрами рӯзномаи байналхалқӣ ва минтақавӣ табодули андеша карданд.

Пешвои миллат муҳтарам Эмомалӣ Раҳмон ба Президенти Ҷумҳурии Узбекистон муҳтарам Шавкат Мирзиёев барои даъват ҷиҳати ташриф овардан ба Ҷумҳурии Узбекистон ва анҷом додани сафари расмӣ, инчунин пазироии самимӣ изҳори сипос карда, итминон намуданд, ки мулоқоти имрӯза ба раванди рушди босуботи маҷмӯи муносибатҳои неки ҳамсоягии кишварҳо такони ҷиддӣ мебахшад.

Таъкид гардид, ки ҷониби Тоҷикистон сатҳи кунунии ҳамкориро бо Узбекистон дар тамоми соҳаҳо қадр мекунад ва азм дорад, ки дар оянда низ барои рушди минбаъдаи шарикии стратегии Тоҷикистон ва Узбекистон дар тамоми самтҳои он талошҳои зарурӣ ба харҷ диҳад.

Ҷонибҳо аз мазмуну муҳтавои муносибатҳои дуҷониба ва робитаҳои дипломатӣ, ки имсол ба барқароршавии онҳо 30 сол пур мешавад, изҳори қаноатмандӣ намуданд.

Зимни мулоқот масъалаҳои рушду густариши минбаъдаи муносибатҳо дар доираи муколамаи сиёсии байнидавлатии сатҳи олӣ ва тавсеаи робитаҳои тиҷоратию иқтисодӣ баррасӣ гардиданд.

Сарвари давлат муҳтарам Эмомалӣ Раҳмон дар густариши робитаҳои дуҷониба аҳамияти асосии рушди ҳамкории тиҷоративу иқтисодии ду кишварро махсус зикр карда, иброз доштанд, ки байни кишварҳо заминаи мусбати ҳамкории тиҷоративу иқтисодӣ фароҳам оварда шудааст. Соли ҷорӣ ҳаҷми гардиши мол байни ду кишвар беш аз 600 миллион доллари америкоиро ташкил дода, дар шаш соли охир 40 маротиба боло рафтааст. Ҷонибҳо ба мувофиқа расиданд, ки барои амалисозии тавофуқоти қаблан бадастомада солҳои наздик ҳаҷми гардиши молро то ба 1 миллиард доллари америкоӣ расонанд.

Зимни мулоқот ба баргузории ҷаласаи Комиссияи байниҳукуматӣ ва ҳамоиши тиҷоратии ширкатҳои тоҷикистонӣ дар Узбекистон таваҷҷуҳ зоҳир гардида, онҳоро омили муҳими густариши робитаҳои тиҷоратӣ номиданд.

Дар ҷараёни мулоқот ҷонибҳо ҷанбаҳои воқеии ҳамкории дуҷониба дар соҳаҳои робитаҳои нақлиётӣ, истифодаи маҷмӯи захираҳои обу энергетика, инчунин равобити фарҳангӣ ва гуманитариро баррасӣ намуданд.

Таъкид гардид, ки бо талошҳои муштарак рафтуомади озоди молу хизматрасонӣ таъмин гардид ва шаҳрвандон имкони озоди рафтуомад бо якдигарро доранд. Ҳоло то 20 ҳазор нафар сокинони ду кишвар ҳамарӯза бо ҳадафи равобити тиҷорию гардишгарӣ ва дидани хешу табор ва дӯстон аз марзи миёни кишварҳо озодона убур мекунанд. Ин яке аз комёбиҳои асосии ҳамкории ҳукуматҳо дар солҳои охир мебошад.

Дар мулоқот бори дигар аҳамияти таърихии Эъломия оид ба таҳкими дӯстии абадӣ ва ҳампаймонӣ миёни Ҷумҳурии Тоҷикистон ва Ҷумҳурии Узбекистон зикр карда шуд.

Ҷонибҳо ба масъалаи рушди ҳамкорӣ ва истифодаи имконияти мавҷуда дар соҳаҳои энергетика ва саноат, аз ҷумла дар бахшҳои саноати нассоҷӣ, хӯрокворӣ, пойафзолдӯзӣ, металлургӣ, коркарди маъдан, металлургияи ранга, дорусозӣ, нақлиёту коммуникатсия, сармоягузорӣ ва бонкдорӣ, инчунин дигар соҳаҳои барои ҳарду кишвар манфиатовар таваҷҷуҳ зоҳир карданд.

Ба ҳамкории Тоҷикистон ва Узбекистон дар арсаи фарҳангию гуманитарӣ, бахусус дар бахшҳои илму маориф, фарҳанг ва санъат таваҷҷуҳи хосса зоҳир шуд.

Рушди ҳамкории ду кишвар дар арсаи байналмилалӣ, аз ҷумла дар доираи Созмони Милали Муттаҳид, Иттиҳоди Давлатҳои Мустақил, Созмони ҳамкории Шанхай ва дигар созмонҳо муҳим арзёбӣ гардид.

Ба фаъолияти Узбекистон ҳамчун раиси феълии Созмони ҳамкории Шанхай баҳои баланд дода шуд.

Зимни мулоқот ҷонибҳо масъалаҳои амнияти минтақавию байналмилалӣ ва мушкилоти Афғонистони барои ҳарду давлат ҳамсояро муҳокима карда, атрофи дигар масъалаҳои мубрами минтақавию глобалӣ мубодилаи афкор анҷом доданд.
Мулоқоту музокироти сатҳи олии Тоҷикистону Узбекистон 02.06.2022

Июнь 2, 2022 18:37

Хабарҳои дигари ин бахш

Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ бо лоиҳаҳои биноҳои истиқоматӣ бо маркази хизматрасонию тиҷоратӣ, таваққуфгоҳи нақлиётӣ, меҳмонхона ва майдончаи варзишии кӯдакон шинос шуданд
Сарвари давлат Эмомалӣ Раҳмон дар шаҳри Хоруғ китобхонаи кӯдаконаи вилоятӣ, китобхонаи шаҳрии ба номи Ҳофизи Шерозӣ ва Маркази рушди зеҳни сунъиро ифтитоҳ намуданд
Пешвои миллат Эмомалӣ Раҳмон дар шаҳри Хоруғ Маркази фарҳангӣ, савдо ва Шурои иттифоқҳои касабаи вилоятро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ чойхонаи Хатлонро ба истифода доданд
Сарвари давлат Эмомалӣ Раҳмон дар шаҳри Хоруғ пули мошингузарро мавриди баҳрабардорӣ қарор доданд
Пешвои миллат Эмомалӣ Раҳмон бинои маъмурии Мақомоти иҷроияи ҳокимияти давлатии шаҳри Хоруғро мавриди истифода қарор доданд
Президенти Ҷумҳурии Тоҷикистон Эмомалӣ Раҳмон ба таври фосилавӣ 3,7 км роҳ, 550 метр долони зидди тарма ва пули мошингузарро дар деҳаи Барсеми ноҳияи Шуғнон ба истифода доданд
Сарвари давлат Эмомалӣ Раҳмон дар шаҳри Хоруғ бино ва озмоишгоҳи Муассисаи давлатии нигаҳдории роҳҳои мошингарди Вилояти Мухтори Кӯҳистони Бадахшонро ифтитоҳ намуданд
Cуханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони ноҳияи Шуғнон
Пешвои миллат Эмомалӣ Раҳмон бо роҳбарону фаъолони ноҳияи Шуғнон мулоқот намуданд