Президенти Тоҷикистон бори дигар аз мушкили глобалии камобӣ ҳушдор доданд
ДУШАНБЕ, 06.06.2022/АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон изҳор доштанд, ки агар обшавии пиряхҳо тезтар шавад, Осиёи Марказӣ солҳои оянда ба мушкили камобӣ мувоҷеҳ хоҳад гардид. Сарвари давлати Тоҷикистон дар ин бора 4 июн дар нишасти сеюми Пешвоёни Эътилофи обу иқлим, ки дар арафаи Конфронси дуюми сатҳи баланд бахшида ба Даҳсолаи амал «Об барои рушди устувор» доир гардид, изҳори нигаронӣ карданд.
«Захираҳои об нақши калидӣ доранд, вале дар айни замон, ин захираҳои ҳаётан муҳим имрӯз зери таъсири шадиди тағйироти иқлим қарор гирифтаанд. Ҳол он, ки Тоҷикистон аз ҷумлаи кишварҳои саноатӣ ба шумор намеравад ва 98 фоизи неруи барқи кишвар дар неругоҳҳои барқи обӣ, манбаи барқароршаванда ва аз лиҳози экологӣ тоза истеҳсол мешавад», — иброз доштанд Сарвари давлат.
Мавзӯи асосии суханронии Президенти Тоҷикистон дар ҳамоиш обшавии пиряхҳо буд. Бино ба гуфтаи Сарвари давлат, танҳо дар чанд даҳсолаи охир беш аз ҳазор пирях дар Тоҷикистон аз байн рафта, ҳаҷми умумии пиряхҳои кишвар ба андозаи тақрибан сеяк баробар кам гардидааст.
Эмомалӣ Раҳмон таъкид намуданд, ки, агар обшавии пиряхҳо идома ёбад, Осиёи Марказӣ ба камбуди об дучор мешавад. Тоҷикистон аз обҳои кишвар танҳо 4 дарсадашро истифода мебарад ва боқии он барои кишварҳои поёноб меравад.
«Агар дар солҳои шастуми асри гузашта таъминоти об ба сари ҳар як нафари аҳолӣ дар минтақа солона зиёда аз ҳашт ҳазор метри мукаабро ташкил карда бошад, ин нишондиҳанда имрӯз зиёда аз чор баробар кам гардидааст», – гуфтанд Пешвои миллат Эмомалӣ Раҳмон.
Дар нишасти сеюми Пешвоёни Эътилофи обу иқлим асосан масъалаи тағйирёбии иқлим ва камбуди об баҳс шуд. Петтери Таалас — Дабири кулли Ташкилоти ҷаҳонии обуҳавошиносӣ (WМO) гуфт, имрӯз 2,3 миллиард аҳолии сайёра аз нарасидани об азият мекашанд.
Хотиррасон мешавем, ки пойтахти Тоҷикистон ин ҳафта мизбони чанд нишасти ҷаҳонии вобаста ба мушкилоти об хоҳад буд. Аз 6 то 9 июн дар Душанбе чанд ҳамоиш вобаста ба масъалаи об баргузор мешаванд. Нишасти асосӣ рӯзи 7 июн бо ҳузури Президенти Ҷумҳурии Тоҷикистон Эмомалӣ Раҳмон ва ду муовини Дабири кулли Созмони Милали Муттаҳид доир мегардад.
АКС: Хадамоти матбуоти Президенти ҶТ/АМИТ «Ховар»
Сарвари давлат: «Меҳргон яке аз муҳимтарин ҷашнҳои табиӣ ва фарҳангии мо – тоҷикон аст»
Президенти Ҷумҳурии Тоҷикистон Эмомалӣ Раҳмон бо медали «Барои хизматҳо дар рушди ҳамкории башардӯстона» сарфароз гардонида шуданд
ТОҶИКИСТОН — МИЗБОНИ ЧОРАБИНИҲОИ МУҲИМИ БАЙНАЛМИЛАЛӢ. Интихоби Душанбе чун макони баргузории ин чорабиниҳои муҳим ба таҷриба, эътибор ва нуфузи байналмилалии мамлакат асос ёфтааст
Вуруди Резервати биосферии «Ромит» ба Шабакаи ҷаҳонии мамнуъгоҳҳои ЮНЕСКО — рӯйдоди муҳим дар соҳаи экологии Тоҷикистон
ДИПЛОМАТИЯИ ТОҶИКИСТОН: АЗ СУХАНРОНИИ ТАЪРИХӢ ТО ТАШАББУСҲОИ ГЛОБАЛӢ. Эҳдо ба Рӯзи кормандони хизмати дипломатии Тоҷикистон
Президенти Тоҷикистон: «Таъсиси Маркази минтақавии зеҳни сунъиро дар шаҳри Душанбе салоҳи кор мешуморем»
Пиряхҳо ва дигар манбаъҳои обии Тоҷикистон то 60 фоизи захираҳои оби Осиёи Марказиро ташкил медиҳанд
Тоҷикистон дар соҳаи дипломатияи об мавқеи фаъол дорад
Тоҷикистон аз пайомадҳои манфии раванди тағйирёбии иқлим нигарон мебошад
Эмомалӣ Раҳмон: «Қатъномаи махсуси СММ оид ба эълон кардани «Даҳсолаи таҳкими сулҳ ба хотири наслҳои оянда» мавриди баррасӣ қарор дода шавад»
Президенти Тоҷикистон: «Маҷмаи Умумии СММ имконияти эълон намудани Соли байналмилалии маърифати ҳуқуқиро мавриди баррасӣ қарор диҳад»
Муҳаммадҷаъфари Ёҳаққӣ: «Мо раҳбари хирадмандеро меситоем, ки дасти як миллатро бар «Шоҳнома»-и устоди Тӯс кушода кард»
