ЭҲТИЁТ ШАВЕД! ДАР АФҒОНИСТОН ВАБО АВҶ МЕГИРАД. Дар як шабонарўз дар ду вилоят наздик ба 40 нафар фавтиданд

Июль 14, 2022 13:46

ДУШАНБЕ, 14.07.2022. /АМИТ «Ховар»/. Дар ду вилояти Афғонистон дар як шабонарӯз наздик ба 40 нафар аз бемории вабо фавтиданд. Дар ин бора АМИТ «Ховар» бо истинод ба агентии иттилоотии «Khaama Press» хабар медиҳад.

Хуруҷи бемории марговар дар вилоятҳои Ҳилманд ва Зобул, воқеъ дар ҷануби Афғонистон ба қайд гирифта шудааст. Дар 24 соати охир дар ин ҷо беш аз 120 нафар ба бемории вабо гирифтор шуда, миёни қурбониён на кам аз  15 кӯдак низ ҳаст.

Аксари гирифторони ин беморӣ сокинони навоҳии Багран, Сивари ва Дайчопан мебошанд. Ба ҳарду вилоят дастаҳои сайёри тиббӣ фиристода шудаанд.

Барои баъзе аз шаҳрвандон бо сабабе, ки дар шароити бади санитарию гигиенӣ табобат мегиранд, вабо бо марг анҷом меёбад.

Вазорати тандурустӣ низ, ки аз ҷониби  Толибон ташкил шудааст,  аз чанд ҳолати  сироятёбӣ дар вилояти Қандаҳор хабар дод.

Вабо —  сирояти шадидест, ки тавассути микроорганизми Vibrio cholerae ба вуҷуд меояд. Беморӣ боиси дарунравӣ гардида, ба  норасоии об дар бадан ва халалёбии кори рагҳо оварда мерасонад.

Дар аксар ҳолат сироятёбӣ тавассути оби олудашуда ё маҳсулоти баҳрӣ рух медиҳад.

Хуруҷи бемории вабо дар кишварҳои камбизоати Осиё ва Африқо мунтазам ба қайд гирифта мешавад. Ин, пеш аз ҳама,  ба набудани дастрасии доимӣ ба оби тозаи ошомиданӣ барои қисми зиёди аҳолӣ вобаста аст.

Ёдовар мешавем, ки бо ба сари қудрат омадани Толибон Афғонистонро  буҳрони ҷиддии  иҷтимоӣ  фаро гирифт. Бар асари надоштани дастрасӣ ба  дороиҳои хориҷӣ,  кишвар қариб бепул монд ва рафтани оммавии мутахассисон боиси таназзули тиб гардид.

Дар Афғонистон вазъи иқтисодӣ бо суръати тез  хароб мегардад: нархи озуқа ва сўзишворй баланд шуда, садҳо ҳазор нафар одамон аз кор маҳрум гардиданд ва фаъолияти молиявӣ дар мамлакат якбора паст шуд.

АКС: © AFP 2022 / Ahmad Sahel Arman

Июль 14, 2022 13:46

Хабарҳои дигари ин бахш

Дар пайи эътирозҳо дар Эрон 83 нафар ҳалок шуданд
Подшоҳи Британия Карли III расман сарвари давлатҳои Австралия, Канада ва Зеландияи Нав шуд
ФАВРӢ! Карл III имрӯз Подшоҳи Британияи Кабир эълон мешавад
Малика Елизаветаи II даргузашт
Дабири кулли СММ собиқ президенти Қирғизистон Роза Отунбоеваро намояндаи махсус оид ба Афғонистон таъйин кард
Лиз Трасс дар мақоми Сарвазири Британияи Кабир ба кор оғоз намуд
Дар Чин бар асари заминларза беш аз 40 нафар ба ҳалокат расиданд
Лиз Трасс Сарвазири нави Британияи Кабир гардид
СММ: Бинобар обхезӣ дар Покистон 33 миллион нафар зарар дидаанд
Сатҳи гирифторӣ ба COVID-19 дар як ҳафта дар тамоми минтақаҳои ҷаҳон коҳиш ёфт
Қосим-Жомарт Токаев пешниҳод намуд, ки интихоботи пеш аз муҳлати президентӣ дар Қазоқистон тирамоҳ баргузор шавад
Анҷумани XX Ҳизби коммунистии Чин 16 октябр ифтитоҳ меёбад