Мутахассисони низоми бонкии Тоҷикистон соҳиби сертификатҳои байналмилалии IFAAS гардиданд
ДУШАНБЕ, 08.07.2022 /АМИТ «Ховар»/. Дар доираи роҳандозии Лоиҳаи кӯмаки техникии «Маблағгузории исломӣ барои рушди фарогир» беш аз 2,5 ҳазор нафар шунавандагон-кормандони низоми бонкии кишвар ҷалб гардиданд, ки аз ин омор беш аз ҳазор нафар давраи омӯзиширо хатм намуда, соҳиби шаҳодатномаи байналмилалӣ хатми омӯзишӣ стандартҳои байналмилалии IFAAS гардиданд. Дар ин бора ба АМИТ «Ховар» дар Бонки миллии Тоҷикистон иттилоъ доданд.
Ҷиҳати баланд бардоштани дониши тахассусии кормандони низоми бонкӣ дар доираи барномаи Бонки Осиёии Рушд ҷиҳати татбиқи Лоиҳаи кӯмаки техникии «Маблағгузории исломӣ барои рушди фарогир» дар ҳамкорӣ бо Ширкати машваратии IFAAS, моҳҳои июн-ноябри соли гузашта барои кормандони низоми бонкӣ силсилаи давраҳои омӯзишии фосилавиро роҳандозӣ намуд.
Дар доираи ҳамкории мазкур дар Бонки миллии Тоҷикистон бо иштироки муовини Раиси Бонки миллии Тоҷикистон Фирдавс Толибзода, директори генералии Ширкати машваратии IFAAS Фаррух Раза, роҳбарони ташкилотҳои қарзии молиявӣ, кормандони Бонки миллии Тоҷикистон ва ҷонибҳои манфиатдор ҳамоиш доир гардид.
Фирдавс Толибзода бо натиҷагирӣ аз марҳилаи 1-уми Барномаи мазкур зикр намуд, ки давраҳои омӯзишӣ асосан бо мақсади тақвияти дарку фаҳмиши мутахассисон оид ба принсипҳои маблағгузории исломӣ-муқаддимаи молия, бонкдорӣ, маблағгузории хурд ва лизинг, такафул, сукут, баҳисобгирии муҳосибӣ, идоракунии корпоративӣ тибқи принсипҳои маблағгузории исломӣ, андозбандӣ, идоракунии хавфҳо, сохтори сиёсати молияи исломӣ ва идоракунии пардохтпазирӣ ташкил гардид.
Директори генералии ширкати машваратии IFAAS Фаррух Раза ба шунавандагон ҷиҳати иштироки фаъолона дар барномаи омӯзишӣ изҳори қаноатмандӣ намуда, зикр кард, ки феълан низоми бонкдории исломӣ дар ҷаҳон мавқеи хосро пайдо намуда, таваҷчӯҳи низоми бонкии анъанавиро ба худ ҷалб кардааст. Силсила-давраҳои омӯзишӣ иқдоми амалии сафарбар кардани қувваи зеҳнӣ ҷиҳати воқиф шудан аз меъёрҳои бонкдории исломӣ буда, ба рушди минбаъдаи он дар ҷумҳурӣ тақвият мебахшад.
АКС: Бонки миллии Тоҷикистон
ПУЛИ МИЛЛӢ –«СОМОНӢ». Банкнотаҳои он на танҳо воситаи пардохт, балки бозтоби таърих, фарҳанг, дастовардҳо ва ҳувияти миллии Тоҷикистон мебошанд
ТАЪРИХИ ПАЙДОИШИ АСЪОРИ МИЛЛӢ. Эҳтироми пули миллӣ эҳтироми миллат аст!
ҚУРБИ АСЪОР: 1 доллари ИМА аз 9.1400 то 9.2165 сомонӣ муқаррар шудааст
Дар Остона Конфронси байналмилалии иқтисодии Фонди авруосиёии субот ва рушд баргузор гардид
Тоҷикистон ва Бонки аврупоии таҷдид ва рушд ҳамкориро дар самти таҳкими низоми молиявию бонкӣ густариш медиҳанд
Дар Душанбе оид ба ташхиси макроиқтисодӣ ҳамоиш баргузор шуд
Намояндаи Тоҷикистон дар ҳамоиши минтақавии Бонки осиёии сармоягузориҳои инфрасохторӣ иштирок намуд
Маттео Патроне: «Бонки аврупоии таҷдид ва рушд дар Тоҷикистон лоиҳаҳои гуногунро дар соҳаи энергетика ва бахши хусусӣ амалӣ менамояд»
Президенти Ҷумҳурии Тоҷикистон Эмомалӣ Раҳмон бо Ноиби Президенти Бонки аврупоии таҷдид ва рушд Маттео Патроне мулоқот намуданд
