Теъдоди қурбониёни селу обхезӣ дар Покистон ба 312 нафар расид

ДУШАНБЕ, 27.07.2022 /АМИТ «Ховар»/. Теъдоди қурбониёни боронҳои сели муссонӣ ва обхезиҳо шабонарӯзи гузашта дар Покистон қариб 18 нафар афзоиш ёфтааст. Аз миёнаҳои моҳи июн инҷониб теъдоди қурбониёни ин офатҳо дар кишвар ба 312 нафар расидааст. Тавре АМИТ «Ховар» иттилоъ медиҳад, дар ин бора рӯзи сешанбеи 26 июл рӯзномаи «Express Tribune» бо истинод ба Раёсати миллии мубориза бо офатҳои табиӣ хабар додааст.

Боронҳои беисти шадид зиндагиро дар вилояти Синд, ки рӯзи душанбе бар асари обхезӣ 11 сокини он ҷони худро аз даст доданд, фалаҷ кардаанд. Дар Карочӣ ва шаҳри Ҳайдаробод дар як шабонарӯз 204 миллиметр борон боридааст. Дар Карочӣ тазоҳуроти аҳолӣ бар зидди қатъи тӯлонии неруи барқ, норасоии оби нӯшиданӣ ва нарасидани кумаки мақомот ба сокинони аз ҳавои номусоид зарардида шурӯъ шудаанд.

Дар Исломобод ва шаҳри моҳвораии Равалпиндӣ бинобар туғёни баланди об чанд минтақа ва ҳамчунин бахше аз қаламрави фурудгоҳи байналмилалӣ зери об монда, боиси қатъи парвозҳо шудааст. Бар асари обхезӣ ҳаракат дар баъзе қитъаҳои шоҳроҳ, ки Исломободро бо қисматҳои боқимондаи кишвар мепайвандад, баста шудааст. Дар Балуҷистон сел пулҳоро дар шоҳроҳи Кветта-Карочӣ, ки ҳаракат дар он 10 соат қатъ шуда буд, шуста бурдааст. Мақомот мардуми даҳҳо деҳаҳои зери обхезии дарёи Хаб мондаро тахлия мекунанд.

Ҳукуматдорони Покистон қувваҳои мусаллаҳро барои расонидани ёрии таъҷилӣ ба аҳолие, ки аз обхезӣ зарар дидаанд, дар ҳолати омодабош қарор додаанд.

АКС аз манбаъҳои боз