Бахшида ба 31-солагии Истиқлолияти давлатӣ дар шаҳри Хуҷанд сохтмони корхонаҳои истеҳсолӣ ва биноҳои баландошёна ҷараён дорад

Август 20, 2022 11:58

ДУШАНБЕ, 20.08.2022. /АМИТ «Ховар»/. Ба истиқболи 30-солагии Иҷлосияи 16-уми Шӯрои Олии Ҷумҳурии Тоҷикистон ва 31-солагии Истиқлолияти давлатӣ дар шаҳри Хуҷанд сохтмони корхонаҳои истеҳсолӣ, биноҳои баландошёнаи замонавӣ, муассисаҳои таҳсилоти миёнаи умумӣ ва ғайра бомаром идома дорад. Дар ин бора ба АМИТ «Ховар» дар маркази матбуоти Раиси шаҳри Хуҷанд хабар доданд.

Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода зимни боздид бо ҷараёни корҳои ободонию созандагӣ ва бунёдкориҳо дар маркази маъмуриии вилоят шинос шуданд.

Зимни шиносоӣ бо корхонаи ҶДММ «Доро Инвест», ки дар минтақаи саноатии шимолу шарқии шаҳри Хуҷанд ҷойгир аст, иттилоъ дода шуд, ки сармоягузори корхона соҳибкори маҳаллӣ Абдуаҳад Тоҷибоев буда, таҷҳизот асосан аз давлати Олмон дастрас карда шудаанд.

Фаъолияти асосии коргоҳ ба  истеҳсоли маҳсулоти хӯрокворӣ равона карда шудааст. Баъди ба истифода додани корхона 300 нафар шаҳрвандон бо ҷойи кори доимӣ таъмин карда мешаванд.

Раиси вилоят ба соҳибкор дастур дод, ки ҷиҳати суръатбахшии корҳои сохтмонӣ ва зеббахшии ҳудуди корхона тадбирҳои мушаххас андешад.

Дар доираи корҳои ободонию созандагӣ дар хиёбони Исмоили Сомонӣ бо фармоиши Идораи сохтмони асосии шаҳри Хуҷанд навсозии муассисаи таҳсилоти миёнаи умумии №28 бомаром идома дорад.

Сохтмони мазкур аз 4 ошёнаи барҳаво иборат буда, аз синфхона, китобхона, ошхона, толори маҷлис, инчунин синфхонаҳои озмоишгоҳии фанҳои дақиқ, синфхонаҳо барои таълими меҳнат, ҳуҷраи муаллимон ва толори варзишӣ иборат мебошад. Ҳангоми боздид иттилоъ дода шуд, ки сохтмони 2 адад бинои истиқоматии 12-ошёна, дар ошёнаи якум маркази савдо ва хизматрасонӣ, дар назди бино майдонча барои бозии бачагона, воқеъ дар кўчаи Камоли Хуҷандӣ аз тарафи ҶДММ «Эҷод» ва ҶДММ «Муъмин стар» сохта ва ба истифода дода мешавад.

Сохтмони дигари бинои истиқоматии 12-ошёна бо пентхаус (болохона), дар ошёнаи якум маркази савдо ва хизматрасонӣ. дар назди бино майдонча барои бозии бачагон ва таваққуфгоҳ барои нақлиёти сабукрав, воқеъ дар кўчаи Гагарин аз тарафи соҳибкори маҳаллӣ Ҳусайнов Фаррух бомаром идома дорад.

Инчунин дар хиёбони Исмоили Сомонии шаҳр сохтмони бинои истиқоматии баландошёна бо маркази савдо, таваққуфгоҳи зеризаминӣ бо назардошти майдончаи варзишии бачагона ва ҷойи дамгирии сокинон аз тарафи ҶДММ «Ҳамдастӣ-2013» сохта шуда истодааст. Сармоягузорон соҳибкорони маҳаллӣ мебошанд. Сохтмони мазкур аз 2 адад бинои 12-ошёна бо пентхаус ва дар ошёнаҳои якум ва дуюм марказҳои савдо ва хизматрасонӣ иборат мебошад. Баъди ба истифода додани корхона зиёда аз 30 нафар шаҳрвандон бо ҷойи кори доимӣ таъмин карда мешаванд.

Раиси вилояти Суғд Раҷаббой Аҳмадзода ба роҳбарияти шаҳр ва масъулин ҷиҳати фаъол намудани корҳои созандагию бунёдкорӣ ва истифодаи масолеҳи ватанӣ дар иншооти бунёдшаванда дастуру супоришҳо дод.

АКС: Маркази матбуоти Раиси шаҳри Хуҷанд

Август 20, 2022 11:58

Хабарҳои дигари ин бахш

35-СОЛАГИИ ИСТИҚЛОЛИЯТИ ДАВЛАТӢ. Ба пешвози ин ҷашн дар Хоруғ бунёду навсозии 300 иншоот ба нақша гирифта шудааст
35-СОЛАГИИ ИСТИҚЛОЛИ ДАВЛАТӢ. Дар ноҳияи Лахш бинои нави Раёсати молия ба истифода дода мешавад
Соҳибкори маҳаллӣ дар шаҳри Хоруғ корхонаи истеҳсоли маҳсулоти гӯштӣ месозад
Дар шаҳри Бӯстон корхонаи истеҳсоли оксиген, масолеҳи сохтмонӣ ва коркарди гӯшти мурғ ба истифода дода мешавад
Дар шаҳри Хоруғ маркази савдои «Надим-24» мавриди баҳрабардорӣ қарор гирифт
ОБОДИИ ВАТАН. Соҳибкор пули барои ҳаҷ омодакардаашро барои навсозии пули мошингузари деҳаи Тӯдаи ноҳияи Айнӣ сарф кард
Дар шаҳри Бӯстон маркази забономӯзии «Дониш» мавриди баҳрабардорӣ қарор гирифт
35-СОЛАГИИ ИСТИҚЛОЛИ ДАВЛАТӢ. Саҳми сокинон ва соҳибкорони шаҳри Истаравшан дар мумфаршкунии роҳҳо назаррас аст
35-СОЛАГИИ ИСТИҚЛОЛИЯТИ ДАВЛАТӢ. Роҳи мошингарди маҳаллаи Носири Хусрави шаҳри Хоруғ мумфарш мегардад
РУШДИ САНОАТ. Дар Минтақаи озоди иқтисодии «Кӯлоб» сохтмони корхонаи коркарди намак, истеҳсоли равған ва набот идома дорад
ОБОДИИ МАҲАЛ. Роҳи шаҳраки Консойи шаҳри Гулистон навсозӣ мешавад
Бо иштироки Сарвазири Тоҷикистон Қоҳир Расулзода бинои шуъбаи Агентии назорати давлатии молиявӣ ва мубориза бо коррупсия дар минтақаи Рашт ифтитоҳ шуд