БОЗИҲОИ ҲАМБАСТАГИИ ИСЛОМӢ. Варзишгарони кадом кишварҳо пешсафанд?

ДУШАНБЕ, 12.08.2022 /АМИТ «Ховар»/. Тавре қаблан хабар додем, аз 9 то 18 август дар шаҳри Қунияи Туркия Бозиҳои V ҳамбастагии исломӣ ҷараён мегиранд. Шореҳи варзиши АМИТ «Ховар» бо истинод ба Кумитаи миллии олимпии Тоҷикистон иттилоъ медиҳад, ки дар Бозиҳои ҳамбастагии исломӣ дар Қуния пас аз 3 рӯз натиҷаҳо тибқи ҷадвали мусобиқа чунинанд:

1. Туркия — 55 медал (аз ҷумла 23 тилло),
2. Эрон — 27 медал (8 тилло),
3. Қазоқистон — 16 медал (6 тилло),
4. Узбекистон — 24 медал (5 тилло).

Мавриди зикр аст, ки ба барномаи бозиҳо 20 намуди варзиш: варзиши сабук, камонварӣ, баскетбол, бочча, велосипедронӣ, шамшербозӣ, футбол, гимнастика, ҳендбол, дзюдо, каратэ, кикбоксинг, тирпаронии варзишӣ, шиноварӣ, тенниси рӯи миз, таеквондо, волейбол, варзиши вазнин, гӯштини варзишӣ ва камонварии анъанавӣ ворид шудаанд. Ҳамчунин дар намудҳои тенниси рӯи миз, варзиши сабук, шиноварӣ ва камонварӣ мусобиқаҳо миёни варзишгарони имконияташон маҳдуд доир карда мешаванд.

Ёдовар мешавем, ки варзишгарони тоҷик дар 8 намуд – варзиши сабук, камонварӣ, каратэ, тенниси рӯи миз, таэквондо, вазнабардорӣ ва гӯштӣ рақобат мекунанд.

Варзишгарони тоҷик то кунун ягон медал ба даст наовардаанд. Дастаҳои тенниси рӯи миз баромади худро аллакай ба охир расониданд. Бо иштироки варзишгарони тоҷик 8-12 август мусобиқаи варзиши сабук, 9-12 август мусобиқаи таеквондо, 10-13 август мусобиқаи гӯштин, 11-15 август мусобиқаи вазнабардорӣ, 13-15 август мусобиқаи тенниси рӯи миз миёни варзишгарони имконияташон маҳдуд, 15-18 август мусобиқаи камонварӣ, 15-17 август мусобиқаи гӯштини дзюдо ва 17-18 август мусобиқаи каратэ-до доир хоҳанд шуд.

АКС: КМО Тоҷикистон