ДЗЮДО. Ҳашт нафар паҳлавонони тоҷик дар Ҷоми кушоди Осиё дар Қазоқистон ширкат меварзанд

ДУШАНБЕ, 12.08.2022 /АМИТ «Ховар»/. 13-14 август дар шаҳри Актауи Қазоқистон Ҷоми кушоди Осиё оид ба гӯштини дзюдо (Aktau Asian Open 2022) ба поси хотири Турар Жолдибаев баргузор мешавад. Дар мусобиқаи мазкур Ҷумҳурии Тоҷикистонро 8 нафар варзишгар муаррифӣ мекунанд, хабар додааст шореҳи варзиши АМИТ «Ховар» бо истинод ба Федератсияи дзюдои Тоҷикистон.

Рақобатҳо аз рӯи 14 вазн (7 вазн миёни мардон ва 7 вазн миёни бонувон ) миёни 197 варзишгар аз 6 кишвари Осиё доир мешаванд. Ҳайати дастаи мунтахаби Тоҷикистон дар ин мусобиқа чунин аст: Акбаралӣ Кенҷаев, Аҳмадҷон Аюбов ва Абубакр Шеров- ҳарсе дар вазни то 66кг, Наврӯз Каримзод бо Маҳмудҷон Раҳимов дар вазни то 73кг, Ҳайдар Саидкабирзода дар вазни то 81кг, Кароматулло Ҳакимов дар вазни то 90кг ва Амирҷони Насимҷон дар вазни то 100кг.

Барномаи баргузории мусобиқа:
12 август | ҷумъа
Қуръакашӣ
Оғоз: 14:00

Рӯзи 1 | 13 август | Шанбе
Оғоз: 10:00
Марҳилаи ниҳоӣ: 16:30
Занон: -48кг, -52кг, -57кг, -63кг;
Мардон: -60кг, -66кг, -73кг;

Рӯзи 2 | 14 август | якшанбе
Оғоз: 10:00
Марҳилаи ниҳоӣ: 17:00
Занон: -70кг, -78кг, +78кг;
Мардон: -81кг, -90кг, -100кг, +100 кг;

Хотиррасон менамоем, ки барои мақоми аввал — 100 имтиёз, дуюм – 70 ва сеюм — 50 имтиёз дода мешавад.

АКС: Федератсияи дзюдои Тоҷикистон