Теъдоди осебдидагони таркиш дар маркази савдои Ереван ба 60 нафар расид

ДУШАНБЕ, 15.08.2022 /АМИТ «Ховар»/. Теъдоди осебдидагони таркиш ва сӯхторе, ки бар асари он дар бозори яклухтфурӯшии «Сурмалу»-и Ереван ба амал омад, ба 60 нафар расид. Дар ин бора ТАСС бо истинод ба хадамоти матбуоти Вазорати ҳолатҳои фавқулодаи Арманистон хабар медиҳад.

Ба иттилои ВҲФ, 60 нафар осебдидагон ба бемористонҳо интиқол дода шуданд. Қаблан дар бораи 45 захмӣ хабар расида буд. Барои хомӯш кардани сӯхтор беш аз 200 нафар ҷалб шуданд.

Дар ин таркиш се нафар ҳалок ва зиёда аз 20 нафар бедарак шудаанд.

Таркиш дар маркази савдои «Сурмалу» қаблан 14 август рух дода буд. Эҳтимол ин ҳодиса дар анбори маводи пиротехникӣ рух дода, боиси сӯхтор гардидааст. Аз ин рӯ, бинои маркази тиҷоратӣ фурӯ рехта, мардум зери харобаҳо мондаанд.

Аз рӯи далели таркиш бо ду модда: «вайрон кардани қоидаҳои нигоҳдории моддаҳои зудоташгиранда, ки аз беэҳтиётӣ боиси марги инсон мегарданд» ва «вайрон кардани қоидаҳои бехатарии сӯхтор, ки аз беэҳтиётӣ боиси марги одамон мегарданд” парвандаи ҷиноятӣ боз карда шудааст.

АКС аз манбаъҳои боз