ДАР «ИЛМ ВА ТАБИАТ» ДИРЕКТОРИ НАВ ТАЪЙИН ШУД. Дар ҷадвали барномаҳои шабакаи нави телевизионӣ чӣ навгониҳо ба амал меоянд?

Сентябрь 3, 2022 15:23

ДУШАНБЕ, 03.09.2022 /АМИТ «Ховар»/. Тавре қаблан хабар додем, бо Қарори Ҳукумати Ҷумҳурии Тоҷикистон аз 17 августи соли 2022 таҳти рақами 397 Шарифзода Саймукарам Ислом директори Муассисаи давлатии телевизиони «Илм ва табиат» таъйин карда шуд.

Саймукарам Шарифзода 36-сола буда, дар мақоми нав Зиннатулло Исмоилзодаро, ки раиси Иттифоқи журналистони Тоҷикистон мебошад, иваз кард.

Саймукарам Шарифзода то ин таъйинот дар шабакаи телевизионии иттилоотии «Ҷаҳоннамо» ва баъдан дар шабакаи асосии телевизиони давлатии кишвар «Тоҷикистон» кор кардааст. Муддати се сол дар вазифаи муҳаррири Идораи барномаҳои мусиқӣ ва ду сол чун барандаи барномаи бомдодии «Субҳ»фаъолият намудааст. 11 соли охир яке аз наттоқони асосии барномаи иттилоотии «Ахбор» буд.

Ёдовар мешавем, ки Муассисаи давлатии телевизиони «Илм ва табиат» 14 декабри соли 2021 дар Рӯзи илми тоҷик ба пахши барномаҳо шурӯъ кард. Дар бораи таъсиси он Президенти мамлакат, Пешвои миллат муҳтарам Эмомалӣ Раҳмон моҳи марти соли 2020 зимни мулоқот бо намояндагони аҳли зиё дар остонаи ҷашни байналмилалии Наврӯз супориш дода буданд.

Сарвари давлат намояндагони илму маориф ва фарҳанги кишварро бо фарорасии ҷашни баҳор табрик гуфта, дар доираи эълон гардидани Бистсолаи омӯзиши илмҳои дақиқ ва табиатшиносӣ супориш доданд, ки шабакаи нави телевизионӣ таъсис дода шавад. «Кумитаи телевизион ва радио вазифадор карда мешавад, ки дар муддати шаш моҳ шабакаи нави телевизиониро бо номи «Илм ва табиат» таъсис диҳад», — чунин супориш доданд Пешвои миллат зимни суханронии худ.

Ва аллакай моҳи августи ҳамон сол Ҳукумати мамлакат дар бораи таъсиси шабакаи нави телевизионӣ қарор ба тасвиб расонд.

Директори нави телевизион Саймукарам Шарифзода дар суҳбат бо хабарнигори АМИТ «Ховар» изҳор дошт, ки дар якҷоягӣ бо кормандони шабака кӯшиш ба харҷ медиҳад, то таваҷҷуҳи ҷавонон ба омӯзиши илмҳои дақиқ зиёд гардад. «Барои ин нақша дорем, бо истифода аз имкониятҳои телевизион ва ҷалби мутахассисони варзида ва коршиносони соҳа омӯзиши фанҳои табиӣ, дақиқ, риёзӣ, техникӣ ва технологиро ба роҳ монем», — гуфт ӯ.

Ба зикри директор, ҳоло барномаҳои «Сайри кайҳон», «Илм ва амал», «Баракат», «Чор унсур», «Суфраи табиат», «Теғи Сино» ва «Ҷилои дониш» мунтазам пахш мешаванд.

Муассисаҷиҳати таҳияи лоиҳаи як қатор барномаҳои ҷадид даст ба кор шудааст. Аз ҷумла, таҳияи лоиҳаҳо бо номҳои шартии «Илм ва технология», «Об рушди устувор», «Ворисони илм», «Рисолаи мусиқӣ», «Суоли илмӣ», «Сайёд», «Чароғи ақл», «Як рӯзи…», «Иқлим», «Сарват», «Гиёҳнома» ба андозаи 80 фоиз иҷро гардида, рӯзҳои наздик мавриди амал қарор дода мешаванд.

«Дар барномаҳои нав дар бораи дастовардҳои илми ватаниву ҷаҳонӣ ва ихтирооти инноватсионии олимони дохиливу хориҷӣ суҳбат мекунем», — гуфт Саймукарам Шарифзода.

Ёдовар мешавем, ки муассисаи давлатии телевизиони «Илм ва табиат» шурӯъ аз 1 сентябри соли 2022 дар саросари Тоҷикистон тавассути моҳвораи «YAHLAIF» дар ҳаҷми 16 соат пахш мегардад. Он барои муштариён давоми чор моҳ ба шакли HD барномаҳояшро ройгон пахш менамояд.

Зарангези ЛАТИФ,
АМИТ «Ховар»

АКС аз бойгонии шахсии С. Шарифзода

Сентябрь 3, 2022 15:23

Хабарҳои дигари ин бахш

Антропологи машҳури рус дар ёдгории Сари Майни ноҳияи Айнӣ таҳқиқот мегузаронад
НИШАСТҲОИ МАТБУОТӢ. 21 июл дар вазорату идораҳои Тоҷикистон нишастҳои матбуотӣ оғоз мегарданд
«Қалъаи Хуҷанд» ба рӯйхати 10 мавзеи ҷолиби сайёҳии Тоҷикистон шомил гардидааст
Дар мавзеи Сари Майни ноҳияи Айнӣ корҳои омӯзишии бостоншиносӣ ва антропологӣ оғоз ёфт
Санъаткорони Қирғизистон Осорхонаи миллии Тоҷикистонро тамошо карданд
Дар Душанбе бо мақсади рушди ҳамкорӣ дар самти илмҳои яхшиносӣ вохӯрӣ баргузор гардид
Ба Маркази мероси хаттӣ беш аз 100 нусха китобҳои чопи сангӣ ва дастнависҳо тақдим гардид
«ШОҲНОМА». Фирдавсӣ дар сар то сари ин асари безавол дӯст доштани Ватанро таъкид мекунад
Беш аз 23 ҳазор нусха китобҳои Китобхонаи миллии Тоҷикистон ба шаҳру ноҳияҳои ҷумҳурӣ фиристода шуд
«ДӮСТИИ АБАДӢ». Таҳту чунин унвон барномаи фарҳангии Тоҷикистон ва Қирғизистон доир мегардад
Собиқ Вазири фарҳанги Ҷумҳурии Тоҷикистон Тамара Абдушукурова аз олам даргузашт
Ҷаласаи вазирони фарҳанги давлатҳои аъзои Созмони ҳамкории Шанхай доир гардид