БА ПЕШВОЗИ 30-СОЛАГИИ ИҶЛОСИЯИ ХVI ШӮРОИ ОЛӢ. Дар Хуҷанд корхонаи саноатӣ ва иншооти ёрирасони таълимӣ бунёд мешаванд

 ДУШАНБЕ, 26.10.2022 /АМИТ «Ховар»/. Ба истиқболи 30-солагии Иҷлосияи ХVI Шӯрои Олии Ҷумҳурии Тоҷикистон дар ҳудуди Минтақаи озоди иқтисодии «Суғд» аз ҷониби ҶСП «Корпоратсияи Камоли Хуҷандӣ» корхонаи коркарди санг бунёд мешавад, ки масоҳати умумии он  беш аз 1 гектар аст. Дар чунин масоҳат бинои маъмурӣ ва коргоҳҳои истеҳсолӣ, аз ҷумла коркарди санг бунёд мегарданд.

Дар ин бора ба АМИТ «Ховар» дар Хадамоти матбуоти Раиси вилояти Суғд хабар доданд.

Раиси вилояти Суғд Раҷаббой Аҳмадзода дар шаҳри Хуҷанд бо ҷараёни корҳои ободонию созандагӣ шинос гардид.

Корхонаи коркарди санг аз ҳисоби маблағҳои ҶСП «Корпоратсияи Камоли Хуҷандӣ» сохта шуда, ҳаҷми маблағи сармоягузорӣ 1,4 миллион доллари амрикоиро ташкил медиҳад. Аз ҷониби ширкат барои истеҳсоли маҳсулоти рақобатпазир ва ҷавобгӯи талабот технологияи пешрафтаи ширкатҳои бонуфузи ҷаҳон дастрас карда шудааст. Иншоот аз як ошёна иборат буда, баъди ба фаъолият оғоз намудани он барои 40 нафар сокини маҳаллӣ ҷойи кори доимӣ фароҳам мегардад.

Корхонаи коркарди санг тибқи лоиҳаи сохтмонӣ бо истифода аз масолеҳи сохтмонии аълосифат ва ҷалби сохтмончиёни маҳаллӣ бо тарҳи муосир сохта мешавад.

Сипас Раиси вилоят аз Донишгоҳи давлатии ҳуқуқ, бизнес ва сиёсати Тоҷикистон боздид намуд. Дар донишгоҳ бинои нави замонавӣ, толори барҳавои маҷлисгоҳ, ошхона ва дигар иншооти ҷашнӣ барои истифода омода шуда истодаанд.

Иттилоъ дода шуд, ки иншооти мазкур аз ду ошёна иборат буда, пурра бо масолеҳи ватанӣ сохта шудааст. Иншооти навбунёд дорои 20 синфхона, 4 озмоишгоҳ, аз ҷумла озмоишгоҳи криминалистӣ, компютерӣ, студия, 4 синфхонаи лексионӣ буда, бо навтарин таҷҳизоти соҳавӣ муҷаҳҳаз гардонида шудааст.

Раиси вилоят пас аз шиносоӣ ба масъулини соҳаи сохтмону роҳбарияти шаҳр барои пурра ба охир расонидани корҳои сохтмонӣ ва тақвияти корҳои ободонию сабзазоркунӣ дастуру супоришҳо дод.

АКС: Хадамоти матбуоти Раиси вилояти Суғд