Ҷамолиддин Абдуллозода бо ҷараёни табобати осебдидагони муноқишаҳои марзӣ шинос гардид

ДУШАНБЕ, 10.10.2022 /АМИТ «Ховар»/. Дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода 7 октябр бо ҷараёни табобати осебдидагони муноқишаҳои марзӣ шинос гардид. Зимни сафари корӣ вазир бо фаъолияти якчанд муассисаи тандурустии вилоят, аз ҷумла беморхонаи ҷамоати Чоркӯҳи шаҳри Исфара, беморхонаҳои марказии шаҳри Исфара ва ноҳияи Бобоҷон Ғафуров, инчунин Беморхонаи клиникии №1-и шаҳри Хуҷанд ​ шинос шуд.

Тавре аз маркази матбуоти Вазорати тандурустӣ ва ҳифзи иҷтимоии аҳолии мамлакат ба АМИТ «Ховар» иттилоъ доданд, Ҷамолиддин Абдуллозода зимни суҳбат бо ҷароҳатбардоштагон иброз дошт, ки ҷараёни табобати онҳо зери назорати махсуси Пешвои миллат Эмомалӣ Раҳмон қарор дошта,​ Вазорати тандурустӣ ва ҳифзи иҷтимоии аҳолии мамлакат тамоми кӯшишу талоши худро ба ҳарчи зудтар барқарор намудани вазъи саломатии осебдидагон равона намудааст.

Зикр шуд, ки айни ҳол дар беморхонаҳои мазкур барои табобати беморон тамоми шароит ва имконоти мусоид фароҳам оварда шудааст.

Вазири тандурустӣ ва ҳифзи иҷтимоии аҳолии мамлакат  бо наздикону пайвандони осебдидагони муноқишаҳои марзӣ низ суҳбат намуд. Ба оилаҳои табибоне, ки бар асари муноқишаҳои марзӣ ҷони худро аз даст доданд, аз номи Ҳукумати Ҷумҳурии Тоҷикистон кумакҳои ғизоӣ ва сӯзишворӣ расонида шуданд.

Ҷиҳати беҳтар намудани сатҳу сифати хизматрасонии тиббӣ ба аҳолӣ Вазири тандурустӣ ва ҳифзи иҷтимоии аҳолии Ҷумҳурии Тоҷикистон ба роҳбарони муассисаҳои тандурустии болозикр ва Раёсати тандурустии вилояти Суғд дастуру супоришҳои мушаххас дода, зикр намуд, ки хизматрасонии тиббӣ ба аҳолӣ, омодагӣ ба давраи зимистон, аз ҷумла захираи маводи ​ сӯзишворӣ, доруворӣ ва ғизоӣ аз ҷумлаи дастуру супоришҳои Роҳбари давлат дар самти беҳтар намудани сатҳу сифати хизматрасонии тиббӣ ба аҳолӣ мебошад.

АКС: Вазорати тандурустӣ ва ҳифзи иҷтимоии аҳолии ҶТ