Дар Арманистон ҷаласаи 44-уми Шӯрои байнидавлатии ИДМ оид ба геодезия, харитасозӣ, кадастр ва мушоҳидаи фосилавии Замин баргузор шуд

ДУШАНБЕ, 26.10.2022 /АМИТ «Ховар»/. Ҳайати Кумитаи давлатии идораи замин ва геодезии Ҷумҳурии Тоҷикистон таҳти роҳбарии Ориф Хоҷазода дар ҷаласаи 44-уми Шӯрои байнидавлатии ИДМ оид ба геодезия, харитасозӣ, кадастр ва мушоҳидаи фосилавии Замин, ки 24-26 октябр дар шаҳри Еревани Ҷумҳурии Арманистон баргузор шуд, иштирок намуд, хабар медиҳад АМИТ «Ховар» бо истинод ба Кумитаи мазкур.

Раиси Кумитаи давлатии идораи замин ва геодезии Ҷумҳурии Тоҷикистон Ориф Хоҷазода вобаста ба дастовардҳои Кумитаи давлатӣ ва ҷараёни иҷрои қарорҳои Шӯрои байнидавлатии ИДМ оид ба геодезия, харитасозӣ, кадастр ва мушоҳидаи фосилавии Замин изҳори назар намуд.

Дар ҷаласа ҷараёни иҷрои қарорҳои Шӯрои мазкур ва фаъолияти муштарак дар самти геодезия, харитасозӣ, кадастр мавриди баррасӣ қарор гирифта, аз натиҷаи баррасии масъалаҳои рӯзномаи ҷаласа протокол ба имзо расид.

Ёдовар мешавем, ки Шӯрои байнидавлатии Иттиҳоди Давлатҳои Мустақил оид ба геодезия, харитасозӣ, кадастр ва мушоҳидаи фосилавии Замин соли 1992 таъсис ёфта, то имрӯз 43 ҷаласаи он дар ҳар давлати аъзо бо навбат гузаронида шудааст.

Мақсади таъсиси Шӯрои мазкур- истифодаи таҷрибаи пешқадам дар соҳаи заминсози геодезия, харитасозӣ, мушоҳидаи фосилавии замин ва омода намудани мутахассисони касбӣ дар донишгоҳҳои Федератсияи Россия, Беларус ва дигар давлатҳои аъзо мебошад.

Мавриди зикр аст, ки Ҷумҳурии Тоҷикистон аъзои бевоситаи Шӯрои байнидавлатии ИДМ оид ба геодезия, харитасозӣ, кадастр ва мушоҳидаи фосилавии Замин буда, дар ҷаласаҳои шӯрои мазкур фаъолона иштирок менамояд.

АКС: Кумитаи давлатии идораи замин ва геодезии Ҷумҳурии Тоҷикистон