Дар шаҳри Новокузнетски Россия таъриху фарҳанги миллати тоҷик муаррифӣ гардид

Октябрь 31, 2022 15:35

ДУШАНБЕ, 31.10.2022 /АМИТ «Ховар»/. Аз 28 то 30 октябр дар шаҳри Новокузнетски вилояти Кемеровои Федератсияи Россия Фестивали «Таваллудшуда дар Иттиҳоди Шӯравӣ» баргузор гардид, ки дар он ҳар қавму миллати собиқ Иттиҳоди Шӯравӣ хотираҳояшонро аз гузаштаи ниёгон, даврони шӯравӣ ва имрӯз пешниҳоди шаҳрвандону меҳмони шаҳр намуданд.

Тавре хабарнигори махсуси АМИТ «Ховар» дар Федератсияи Россия Садбарги БОҚӢ иттилоъ медиҳад, гӯшаи тоҷиконаро дар фестивал Ҷамъияти тоҷикони минтақавии вилояти Кемерово дар шаҳри Новокузнетск — «Дӯстии тоҷику рус» ба уҳда гирифта буд. Дар ин гӯша нақшу нигори тоҷикӣ, ашёи рӯзгор, гаҳвора, хӯроку хӯришҳои миллӣ, меваҳои тару хушки Тоҷикистон, асбоби мусиқӣ, китобҳо, дастнависҳо аз шоирону адибони классик ва адабиёти муосири миллати тоҷик ба намоиш гузошта шуданд. Меҳмонон ва иштирокчиёни фестивал-намоиш ба гӯшае, ки инъикосгари таъриху фарҳанг ва расму оини тоҷикон буд, бештар мароқ зоҳир карда, доир ба табиати нотакрори Тоҷикистон ва меваҳои шаҳдбори он маълумоти муфид ба даст оварданд.

Раиси Ҷамъияти тоҷикони минтақавии вилояти Кемерово дар шаҳри Новокузнетск «Дӯстии тоҷику рус» Шавкат Тоҳиров аз иқдоми фарҳангӣ, ки аз ҷониби масъулини шаҳру вилояти Новокузнетск пайваста роҳандозӣ мегарданд, истиқбол кард. Ӯ иброз дошт, ки онҳо дар чунин ҳамоишҳои сатҳи баланд иштироки фаъолона дошта, таъриху фарҳанги миллати тоҷикро, ки аз қаъри асрҳо сарчашма мегиранд, муаррифӣ менамоянд.

«Мо аз иқдоми роҳбарияти шаҳру вилоят хеле хушҳолем ва онро ҳамаҷониба дастгирӣ мекунем, зеро мо миллати дорои таъриху фарҳанги куҳан, санъату ҳунари беназир ва расму оини миллӣ ҳастем. Мо бо ифтихор дар чунин фестивал — намоишҳо иштирок карда, ба ин васила ба мардуми ин минтақаи Федератсияи Россия ва миллату халқияти дигари олам, ки ин ҷо сукунат доранд, тамоми дастовардҳои Тоҷикистони азизро муаррифӣ менамоем“,–мегӯяд Шавкат Тоҳиров.

Ба таъкиди ҷонишини Раиси Ҷамъияти тоҷикони шаҳри Новокузнетск оид ба фарҳанг ва варзиш Маҳмадкарими Абдураҳим, «мо тӯли солҳост, ки дар ҳама фестивалу чорабиниҳои шаҳрию вилоятӣ ва ҳамоишҳои фарҳангию варзишӣ иштирок менамоем ва кӯшиш ба харҷ медиҳем, ки фарҳанг, таърих, расму анъана ва ҷашну маросими тоҷиконро ба дигар қавму миллатҳо муаррифӣ намоем. Мо дар ин замина фарзандони худро дар рӯҳияи дӯст доштани Ватан ва ҳифз намудани тамоми арзишҳои миллӣ ба камол мерасонем».

Дар рӯзи сеюми фестивал консерти сарояндагони тамоми ҷамъият ва қавму миллатҳои ин минтақа баргузор гардид, ки Гурӯҳи созию овозии «Нур»-и назди Ҷамъияти тоҷикони минтақавии вилояти Кемерово дар шаҳри Новокузнетск «Дӯстии тоҷику рус» дар он ширкати фаъол намуд. Ба хотири дар сатҳи баланд иҷро намудани суруду оҳангҳои тоҷикӣ санъати ин гурӯҳи ҳунарӣ қадрдонӣ гардид.

Дар хатми фестивал аз ҷониби узви Шӯрои миллатҳои назди Раёсати шаҳрии Новокузнетск Владимир Табачников ба Раиси Ҷамъияти тоҷикони минтақавии вилояти Кемерово дар шаҳри Новокузнетск- «Дӯстии тоҷику рус» Шавкат Тоҳиров дар вазъияти тантанавӣ Ифтихорнома тақдим карда шуд.

АКС: Ҷамъияти тоҷикони минтақавии вилояти Кемерово

 

Октябрь 31, 2022 15:35

Хабарҳои дигари ин бахш

Дар Бадахшон бо иштироки ҳайати Иттифоқи нависандагони Тоҷикистон маҳфили адабӣ доир шуд
«ТОҶИКИСТОН – ВАТАНИ АЗИЗИ МАН». Даври сеюми ин озмуни ҷумҳуриявӣ моҳи сентябр баргузор мешавад
Ҳайати котиботи номинатсияи фаромиллии Роҳи абрешим: Долони Фарғона — Сирдарё бо ёдгориҳои таърихӣ, фарҳангӣ ва меъмории Суғд шинос мегардад
Олимони Чин бо фаъолияти расадхонаҳои Тоҷикистон шинос шуданд
Вобаста ба масъалаҳои таъмини ҳифзи сирри давлатӣ дар матбуот ва дигар воситаҳои ахбори омма машварати омӯзишӣ доир гардид
22 июл дар Вазорати фарҳанг, Кумитаи телевизион ва радио, Ваколатдор оид ба ҳуқуқи инсон, КВД «Хоҷагии манзилию коммуналӣ» ва МД «Телевизиони Сафина» нишасти матбуотӣ баргузор мегардад
Дар Душанбе намоиши «Намунаҳои атласу адраси тоҷикӣ аз фонди Осорхонаи миллӣ» ифтитоҳ гардид
22 июл дар Тоҷикистон нишастҳои матбуотии вазорату идораҳо оғоз мегарданд
Сайёҳон ба воситаи аудиошунавоӣ бо мавзеъҳои таърихиву фарҳангии шаҳри Хуҷанд шинос мешаванд
«ТОҶИКИСТОН-ВАТАНИ АЗИЗИ МАН». Ба даври сеюми ин озмуни ҷумҳуриявӣ 525 довталаб роҳхат гирифт
Бахшида ба 100-солагии адабиётшиноси маъруфи тоҷик Соҳиб Табаров ҳамоишу маҳфилҳои илмӣ-адабӣ доир мешаванд
Донишкадаи умумирусиягии кинематографияи ба номи Сергей Герасимови шаҳри Москва қабули довталабонро эълон намуд