ИНТИХОБОТИ ПРЕЗИДЕНТИ ҚАЗОҚИСТОН. Токаев ният дорад, ки номзадии худро ба президентӣ аз эътилофи васеъ пешниҳод намояд

ДУШАНБЕ, 06.10.2022 /АМИТ «Ховар»/. Президенти Ҷумҳурии Қазоқистон Қосим-Жомарт Токаев гуфт, ки мехоҳад дар интихоботи пеш аз муҳлати президентӣ на аз ягон созмони мушаххас, балки аз эътилофи неруҳои ҷамъиятиву сиёсӣ номзад шавад. Тавре АМИТ «Ховар» хабар медиҳад, дар ин бора АМИ «Казинформ» бо истинод ба хадамоти матбуоти Президенти Қазоқистон иттилоъ додааст.

«Фикр мекунам дуруст мебуд, ки ман на аз ягон ташкилоти алоҳида, балки аз эътилофи васеи қувваҳои ҷамъиятию сиёсӣ, ки асоси ислоҳоти иҷтимоии дар мамлакат гузарондашавандаро ташкил медиҳанд, номзадии хешро пешниҳод намоям»,- зикр намуд Токаев зимни вохӯрӣ бо аҳли ҷамъияти вилояти Павлодар.

Ин, ба ақидаи президент, «имконият медиҳад, ки принсипи баробарии сарвари давлат аз ҳизбҳо ва иттиҳодияҳои гуногун тасдиқ карда шавад».

Охири моҳи апрел Токаев аз ҳизби ҳоким «Amanat» (собиқ Nur Otan), ки сарварии онро охири моҳи январи соли 2022 пас аз бетартибиҳои оммавӣ дар кишвар бар зимма дошт, хориҷ шуд.

Баргузории интихоботи пеш аз муҳлати президентӣ дар Қазоқистон 20 ноябр муайян гардидааст. Тибқи қоидаҳои нав, президент имкон дорад ин мансабро танҳо як маротиба барои 7 сол ишғол намояд. Пешбарии номзадҳо 23 сентябр оғоз шуда, то 11 октябр идома хоҳад ёфт.

АКС: Хадамоти матбуоти Президенти ҶҚ