IRS: Дар километрҳои 154-160-и роҳи мошингарди Душанбе-Чаноқ баландии барф зиёд гардидааст

ДУШАНБЕ, 19.10.2022. /АМИТ «Ховар»/. Шаби гузашта бориши барфу борон дар роҳи мошингарди Душанбе-Чаноқ идома ёфта, дар километрҳои 154 — 160 баландии барф зиёд гардид.  Дар айни ҳол кормандони филиали Ширкат аз тамоми имконият истифода бурда истодаанд,  то роҳ мунтазам аз барф тоза карда шавад. Ин кор аз субҳи барвақт ҷараён дорад.   Дар ин бора ба хабарнигори  АМИТ «Ховар» дар маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон хабар доданд.

   Ба таъкиди роҳбарияти ширкати IRS, «бо мақсади ба амал наомадани танбашавии воситаҳои нақлиёт каме маҳдудият ҷорӣ гардид ва аз ронандагону мусофирон  хоҳишмандем, ки моҳияти онро дарк намоянд».

Баробари расидани  иттилои нав оид ба вазъи роҳи мазкур маълумоти иловагӣ пешниҳод мегардад.

АКС: Маркази матбуоти ширкати IRS