Ҷамшед Машрабзода президенти нави Федератсияи гӯштини Тоҷикистон интихоб шуд

ДУШАНБЕ, 11.11.2022 /АМИТ «Ховар»/.  11 ноябр дар Кумитаи миллии олимпии Тоҷикистон ҷаласаи ғайринавбатии Шӯрои Федератсияи гӯштини Тоҷикистон баргузор шуд. Дар он  истеъфои президенти федератсия Комил Мирзоалӣ тасдиқ гардида, президенти нави Федератсияи гӯштини Тоҷикистон Ҷамшед Машрабзода интихоб шуд. Дар ин бора ба АМИТ «Ховар» дар Кумитаи миллии олимпии Тоҷикистон хабар доданд.

Ҷамшед Машрабзода ба иштирокчиёни ҷаласа барои боварӣ изҳори миннатдорӣ карда, иброз дошт, ки дар ҳамкорӣ бо Кумитаи миллии олимпии Тоҷикистон ва дастгирии Ҳукумати Ҷумҳурии Тоҷикистон барои рушди гӯштини тарзи озод ва юнонӣ-римӣ талош мекунад.

“Бояд дар навбати аввал рушди гӯштин миёни наврасон таъмин карда шавад. Зеро агар варзишгар ҳамаи зинаҳоро тай кунад, ба дастовардҳои назаррас ноил хоҳад шуд. Барои ин мо сохтмони як толорро барои тамрини дастаҳои мунтахаби ҳам наврасон ва ҳам ҷавонону калонсолон ба нақша гирифтаем. Бо дастгирии Ҳукумати ҷумҳурӣ ва Раиси шаҳри Душанбе муҳтарам Рустами Эмомалӣ дар наздиктарин фурсат сохтмони Маркази гӯштинро дар пойтахт шурӯъ хоҳем кард”,-гуфт Ҷамшед Машрабзода.

Дар идома бо пешниҳоди президенти нави Федератсия мутахассисони соҳаи варзиш Шодӣ Баҳромов, Саидҷалол Саидов, Алишер Каримов ноибони президент ва Тоҳир Шаҳобзода котиби генералии Федератсияи гӯштини Тоҷикистон интихоб шуданд.

Ноиби Президенти Кумитаи миллии олимпии Тоҷикистон Дилшод Назаров, ки дар ҷаласа ба ҳайси меҳмони ифтихорӣ иштирок дошт, роҳбарияти нави федератсияро табрик намуда, ёдовар шуд, ки дастоварди варзишгарони мо дар намуди гӯштин назаррас аст. Аз ҷумла мо аз ин намуд медали нуқраи Бозиҳои олимпӣ, нуқраи Чемпионати ҷаҳон, медали тиллои Чемпионати Осиё, ҷоизадорони Бозиҳои олимпии наврасон, Чемпионати ҷаҳон миёни наврасон ва ғайра дорем.

Дилшод Назаров изҳори умед кард,  ки бо фароҳам овардани  шароити хуб ва дастгирии пайваста гӯштингирони мо имкони ба даст овардани натиҷаҳои назаррасро доранд.

Акс: КМО