Ҳиндустон қоидаҳои нави вуруди шаҳрвандони хориҷиро ҷорӣ намуд

ДУШАНБЕ, 28.11.2022 /АМИТ «Ховар»/. Дар Ҳиндустон аз рӯзи ҷумъа қоидаҳои нав барои хориҷиёне, ки ба ин кишвар меоянд, эътибор пайдо карданд. Тавре АМИТ «Ховар» бо истинод ба ТАСС иттилоъ медиҳад, дар ин бора Вазорати тандурустии Ҳиндустон хабар додааст.

Мувофиқи дастури мақомот, пеш аз ворид шудан ба Ҳиндустон, «ҳамаи сайёҳон бояд дар сомонаи www.newdelhiairport.in варақаро пур кунанд. Онҳо инчунин бояд санҷиши манфии дастгоҳи занҷираи полимеразӣ барои коронавирусро ба сомонаи расмии фурудгоҳи Деҳлии Нав ворид кунанд, ки он на дертар аз 72 соат пеш аз ворид шудан ба Ҳиндустон гирифта шуда бошад. Вазорати тандурустӣ ҳушдор додааст, ки барои пешниҳоди маълумоти бардурӯғ «ба ҷавобгарии ҷиноӣ кашида мешаванд».

Инчунин мусофирон бояд пеш аз савор шудан ба ҳавопаймо дар кишвари интиқолдиҳанда ҳарорати худро чен кунанд. Агар ҳангоми ворид шудан ба Ҳиндустон сайёҳ нишонаҳои ин бемориро нишон диҳад, вай барои ҷудонигоҳдорӣ ба муассисаи тиббӣ фиристода мешавад. Агар пас аз санҷиши тестии коронавирус дар ӯ мавҷудияти вирус тасдиқ шавад, пас ҳамаи шахсони бо ӯ тамосдошта ба карантин гирифта мешаванд. Дар қоидаҳои нави вуруд ба Ҳиндустон махсусан зикр шудааст, ки санҷиши COVID-19 барои кӯдакони то панҷсола талаб карда намешавад.

Вазорати корҳои дохилии Ҳиндустон аз 15 октябр додани раводиди сайёҳӣ ба хориҷиёнеро, ки бо парвозҳои чартерӣ ба ин кишвар меоянд, оғоз намуд. Аз моҳи марти соли 2020 Ҳиндустон аз сабаби пандемияи COVID-19 барои сайёҳон баста шуда буд.

АКС: unsplash