Мақомоти Чин аз пиронсолон даъват менамояд, ки бар зидди COVID-19 ваксина бигиранд

ДУШАНБЕ, 30.11.2022 /АМИТ «Ховар»/. Ҳукумати Чин нақшаи фаъолгардонии корро оид ба эмгузаронии пиронсолон дар кишвар бо мақсади ҳифзи ин аҳолии осебпазир аз бемории сироятии COVID-19 нашр кард. Дар ин бора агентии «Синхуа» хабар додааст, иттилоъ медиҳад АМИТ «Ховар».

Нақшаи корӣ, ки рӯзи сешанбе аз ҷониби механизми муштараки Шӯрои давлатии Ҷумҳурии Мардумии Чин дар самти пешгирӣ ва назорати COVID-19 нашр шуд, ба он равона шудааст, ки бо дарназардошти таъсири муҳофизатии ваксина ба коҳиши хатари ҷараёни шадид ва ниҳоят вазнини беморӣ, инчунин хатари марг миёни пиронсолони мубтало ба коронавирус мусоидат намояд.

«Бояд кӯшишҳоро ба баланд бардоштани сатҳи эмкунӣ миёни пиронсолони 80-сола ва аз он боло равона карда, ба суръат бахшидани эмкунӣ миёни одамони 60-79-сола бояд идома дода шавад», — гуфта шудааст дар ҳуҷҷат.

Тибқи ин санад, корҳои эмгузаронӣ бояд таҳти роҳбарии ҳукумат ва дар асоси ҳамоҳангии байниидоравӣ сурат бигиранд.

Дар нақша нигоҳдорӣ ва таъмини равиши ҳадафнок ва дақиқ ба таҳқиқот ва идоракунӣ дар ин самт, инчунин мусоидат ба беҳсозии минбаъдаи хадамот ва пурзӯр кардани назорати кори эмгузаронӣ миёни аҳолии куҳансоли кишвар дар назар дошта шудааст.

Тибқи иттилои Кумитаи давлатии тандурустии Ҷумҳурии Мардумии Чин, шабонарӯзи гузашта дар қитъаи Чин беш аз 37,8 ҳазор ҳолати нави гирифторӣ ба коронавирус ошкор шудааст.

АКС: reuters.com