Маҳсулоти Тоҷикистон дар Намоишгоҳи 8-уми байналмилалии Селангор-2022 дар Малайзия муаррифӣ карда шуд

ДУШАНБЕ, 02.11.2022 /АМИТ «Ховар»/. Сафорати Ҷумҳурии Тоҷикистон дар Малайзия дар Саммити 6-уми байналмилалии тиҷоратии Селангор 2022 ширкат намуда, маҳсулоти Тоҷикистонро дар Намоишгоҳи 8-уми байналмилалии Селангор 2022 таҳти унвони «Баъд аз фардо» муаррифӣ намуд. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар доданд.

Дар ҳамкорӣ бо Палатаи савдо ва саноати Ҷумҳурии Тоҷикистон дар чорабинӣ маводи ғизоӣ ва нӯшокиҳои табиии истеҳсолкунандагони ватанӣ, аз қабили «Сиёма», «Оби Файзобод», «Амирӣ», «Витаминҳои Тоҷикистон», «Тути Помир» ва ғайра ба намоиш гузошта шуданд. Имсол дар намоишгоҳ намояндагони ширкатҳои «Амирӣ», «Оби Файзобод» ва дигар соҳибкорони тоҷик ширкат варзида, бо харидорони дохиливу хориҷии Малайзия мулоқот анҷом доданд.

Намоишгоҳи 8-уми байналмилалии Селангор (F&B) 2022 намоишгоҳи маҳсулоти хӯрокворӣ ва нӯшокӣ мебошад, ки ҳамасола саноати ғизоро танаввуъ бахшида, барои ба роҳ мондани ҳамкорӣ миёни ширкатҳо ва истеҳсолкунандагон барномаи глобалӣ эҷод мекунад.

Акс: ВКХ ҶТ