ОГОҲИИ АГЕНТИИ ОБУҲАВОШИНОСӢ. Дар Тоҷикистон бориши пуршиддати борон пешгӯӣ мешавад

ДУШАНБЕ, 03.11.2022 /АМИТ «Ховар»/. 4-5 ноябр дар ноҳияҳои тобеи ҷумҳурӣ, ноҳияҳои доманакӯҳи вилояти Хатлон ва ноҳияи Дарвози ВМКБ бориши пуршиддати борон пешгӯӣ мешавад, иттилоъ доданд ба АМИТ «Ховар» дар Агентии обуҳавошиносии  Кумитаи ҳифзи муҳити зисти назди Ҳукумати Ҷумҳурии Тоҷикистон.

Инчунин 3-5 ноябр дар ноҳияҳои алоҳидаи кӯҳӣ ва доманакӯҳи вилоятҳои Хатлон, Суғд, ноҳияҳои тобеи ҷумҳурӣ ва ноҳияи Дарвози ВМКБ сар задани зуҳуроти селӣ дар назар аст.

3-4 ноябр бо сабаби бориши пуршиддат дар дарёҳои Ёхсӯ, Қизилсӯ (ҷанубӣ) ва дарёҳои аз нишебиҳои ҷанубии қаторкӯҳҳои Ҳисор ҷоришаванда якбора баландшавии сатҳи об аз эҳтимол дур нест.

Дар робита ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон тавсия медиҳад, ки аз корҳои кишоварзӣ, чаронидани чорво дар доманакӯҳ, шикор ва моҳидорӣ, инчунин аз рафтан ба кӯҳҳо худдорӣ намоянд.

Ронандагон ҳангоми ҳаракат дар ағбаҳо ва роҳҳои кӯҳӣ эҳтиёткор бояд бошанд.

  АКС: АМИТ «Ховар»