Сафири ФР Сергей Григорйев Тоҷикистонро барои Россия наздиктарин кишвар дар ҷаҳон унвон кард

Ноябрь 22, 2022 10:22

ДУШАНБЕ, 22.11.2022 /АМИТ «Ховар/. Дар ҷаҳон аз Тоҷикистон дида, кишвари ба Россия наздиктар пайдо кардан душвор аст. Дар ин бора Сафири Россия дар Тоҷикистон Сергей Григорйев зимни мусоҳиба бо ТАСС оид ба ҳамкории ду давлат изҳор дошт, хабар медиҳад АМИТ «Ховар».

«<…> Мо аъзои як иттиҳоди ҳарбию сиёсӣ ба ҳисоб меравем, бинобар ин мо дар соҳаи ҳарбию сиёсӣ иттифоқчӣ ҳастем, ки ин ҳам барои муносибатҳои мо бисёр чизҳоро муайян менамояд. Фикр мекунам, дар ҷаҳон аз Тоҷикистон дида, кишвари ба Россия наздиктар пайдо кардан душвор аст», — гуфт ӯ.

Дар робита ба рушди Тоҷикистон Сафири Россия тазаккур дод, ки дар ин 20 сол ҷумҳурӣ қадами калон ба пеш гузошт.

«Ин ба соҳаҳои иқтисодӣ, иҷтимоӣ ва дигар соҳаҳои ҳаёт дахл дорад», — маънидод кард Сергей Григорйев.

Номбурда ҳамчунин тоҷикистониёнро бо Рӯзи Президент, ки чанд рӯз қабл дар Тоҷикистон таҷлил гардид, шодбош гуфта, зикр кард, ки Иҷлосияи XVI Шӯрои Олӣ аҳамияти таърихӣ дорад.

«Он чӣ ки 30 сол пеш дар Хуҷанд (Иҷлосияи Шӯрои Олии ҷумҳуриро дар назар дорам) рух дод, пеш аз ҳама, барои худи Тоҷикистон ва ҳам барои Россия аҳамияти таърихӣ дошт. Зеро барои Россия чизи асосӣ Тоҷикистони устувору рушдёбанда аст ва он замон ин поя гузошта шуд», — иброз дошт ӯ.

Ба андешаи Сафири Россия, соҳаҳое мавҷуданд, ки ҳарду давлат метавонистанд дар онҳо фаъолонатар ҳамкорӣ намоянд.

«Чанде пеш дар доираи ҷаласаи Комиссияи байниҳукуматӣ роҳбарони ҳайатҳо ба хулосае омаданд, ки дар ҳамкории сармоягузорӣ, ки асоси ҳама гуна ҳамёрии иқтисодӣ маҳсуб мешавад, захираҳои зиёди истифоданашуда мавҷуданд. Аз ин рӯ, ба таври фаврӣ миёни вазоратҳои саноатии ду кишвар гурӯҳи корӣ таъсис дода мешавад, ки пешниҳоди Душанберо дар бораи иштироки бештари Москва дар рушди иқтисоди Тоҷикистон баррасӣ хоҳад кард. Фикр мекунам, барои мо тамоми имконот вуҷуд дорад, ки дар як-ду соли оянда дар ҳамкории сармоягузорӣ пешрафти ҷиддӣ ба даст орем, зеро ояндаи муносибатҳои мо дар ҳамгироии бештар ва ҳамкорист», — илова намуд Сергей Григорйев.

Дар робита ба соҳаи сайёҳии Тоҷикистон ӯ гуфт, ки ҳоло дар Россия дӯстдорони саёҳати экстремалӣ зиёданд ва ин, пеш аз ҳама, кӯҳҳо ва дарёҳо мебошанд. Ҳамаи ин дар Тоҷикистон мавҷуд аст.

Чунин меҳисобам, ки дар инҷо барои саёҳати экстремалӣ имконоти олӣ вуҷуд доранд, ҷойҳое ҳастанд, ки тамаддун ба онҳо таъсири зиёд накардааст, гармобшиносӣ ва чашмаҳои гарм мавҷуданд.

«Танҳо барои таблиғ як миқдор маблағ сарф намудан зарур аст, зеро дар Москва зиндагӣ карда, ҳеҷ гоҳ тарғиби имконияти сайёҳӣ дар Тоҷикистонро надидаам», — иброз дошт Сафири Россия.

Ба назари ӯ, барои ин аз намоишгоҳҳо, форумҳо, майдонҳои гуногуни байналмилалӣ истифода бурдан зарур аст.

Ёдовар мешавем, ки 21 ноябр дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз як қатор сафирони нави кишварҳои хориҷӣ, аз ҷумла аз Сафири Фавқулода ва Мухтори Федератсияи Россия Семён Григорйев эътимоднома қабул карданд.

АКС: ТАСС/АМИТ «Ховар»

Ноябрь 22, 2022 10:22

Хабарҳои дигари ин бахш

Тоҷикистон ва Туркия мубодилаи таҷрибаро дар самти фаъолияти инноватсионӣ ва тадқиқотӣ баррасӣ намуданд
Ҳайати парламентӣ ва сафири Тоҷикистон дар мулоқоти сафирони давлатҳои аъзои СААД бо Вазири корҳои хориҷии Русия иштирок карданд
«СҲШ дар ҷаҳони тағйирёбанда: роҳ ба сӯйи саммити Ню Деҳлӣ». Таҳти чунин унвон дар Душанбе ҳамоиш доир шуд
ПЕШВОИ МИЛЛАТ ВА ИҚДОМОТИ САТҲИ ҶАҲОНӢ. Эътибори байналмилалии Тоҷикистон қавитар мегардад
ҲАМДИЛӢ АЗ ҲАМЗАБОНӢ БЕҲТАР АСТ. 31 соли муносибатҳои дипломатӣ байни Тоҷикистон ва Туркия
Тоҷикистон ва Қирғизистон масоили омодагӣ ба чорабиниҳои соли 2023 дар сатҳи олӣ доиршавандаро баррасӣ карданд
Вазирони корҳои хориҷии Тоҷикистон ва Озарбойҷон суҳбати телефонӣ анҷом доданд
Дар Русия ғолибони Озмун барои беҳтарин мақола бахшида ба 30-солагии Иҷлосияи Шўрои Олии Тоҷикистон муайян шуданд
Дар Москва ҷаласаи навбатии Шӯрои ҷамъиятии назди Сафорати Ҷумҳурии Тоҷикистон дар Федератсияи Русия баргузор гардид
Тоҷикистон ва Италия масъалаҳои рушди муносибатҳои мутақобилан судмандро баррасӣ карданд
Дар Остона бизнес-форумҳои Тоҷикистон ва Қазоқистон баргузор карда мешаванд
Тоҷикистон ва Арабистони Саудӣ масъалаҳои ҳамкории дуҷониба ва бисёрҷонибаро баррасӣ карданд