Бо таъмиру навсозии канали Додихудо камбуди оби полезӣ дар маҳаллаҳои шаҳри Хоруғ бартараф мешавад

ХОРУҒ, 14.12.2022 /АМИТ «Ховар»/. Баҳори соли оянда сокинони маҳаллаҳои Андарситез, Носири Хисрав, Бизмич, Беморхонаи вилоятии шаҳри Хоруғ аз мушкилии норасоии оби полезӣ пурра раҳоӣ меёбанд, зеро бо дастгирии мақомоти иҷроияи ҳокимияти давлатии шаҳру вилоят қисматҳои зиёди канали Додихудо, ки аз мобайни кӯҳдоман мегузарад, бетонпӯш карда мешавад. Дар ин бора мухбири минтақавии АМИТ «Ховар» Файз МИРАСАН хабар додааст.

Сардори шуъбаи беҳдошти замин ва обёрӣ дар Вилояти Мухтори Кӯҳистони Бадахшон Қурбонбек Худоёров гуфт, ки «дарозии канали мазкур 14 километр ва паҳноияш як метр буда, аввали солҳои панҷоҳуми асри гузашта ба тариқи ҳашар сохта шудааст. Дар фасли зимистон аз нисф бештари масоҳати он зери селу сангу тарма мемонад ва чунин ҳолат то то моҳи май идома меёбад. Аз ин рӯ давоми даҳсолаҳо ба сабаби ба таъхир афтодани таъмири канал мавсими обёрӣ низ охири моҳи май ва аввали моҳи июн оғоз мешавад. Дар натиҷа боғу киштзорони наздиҳавлигӣ ва гулу буттаҳои ороишии роҳҳои марказӣ пажмурда ва хушк мегарданд. Бинобар ин аз аввали фасли баҳор кормандони Ҷамъияти масъулияташ маҳдуди «Сохтмончӣ» ба таъмири маконҳои осебпазири ин канал шурӯъ карда, зиёда аз 250 метри онро бетонпӯш намуданд. Аксари масолеҳи оҳану бетонӣ ба ин мавзеъ дастӣ интиқол дода мешавад. Мутахассисони шуъбаи беҳдошти замин ва обёрии вилоят ҷараёни корҳои таъмиру таҷдиди ин шабакаи муҳими обрасониро ба таври ҷиддӣ назорат мекунанд».

Пас аз барфу боронгариҳо ва селфароӣ эҳтимоли пайдо шудани обу лой дар дохили канал вуҷуд дорад. Аз ин рӯ баъди ҳар 20 метр барои ба берун баровардани обу лой ҷойҳои махсус бунёд кардаанд. Сокини маҳаллаи Хоруғ Тоҷиддин Наврӯзов бо изҳори сипос аз роҳбарияти Мақомоти иҷроияи ҳокимияти давлатии вилоят баён дошт, ки «воқеан беобӣ дар фасли баҳор барои мо, махсусан онҳое, ки соҳиби қитъаи замини наздиҳавлигӣ, боғу роғ ҳастанд, хеле душвор аст. Агар ин канал таъмир гардаду об фаровон шавад, маҳаллаҳои тарафи рости дарёи Ғунди шаҳри Хоруғ боз ҳам ободу зеботар хоҳанд гашт».

Ҳамзамон гурӯҳи дигари коргарон таъмиру навсозии канали Темурро, ки дарозиаш 13 километр буда, дар тарафи чапи дарёи Ғунд ҷойгир аст, идома медиҳанд. Дар инҷо аллакай корҳои бетонпӯшкунии баъзе қисматҳои каналро ба охир расондаанд.

АКС: АМИТ «Ховар»