Моҳи марти соли 2023 дар деҳаи Бобосафоли ноҳияи Фархор мактаби №28 дари худро ба рўи хонандагон боз менамояд

ДУШАНБЕ, 29.12.2022. /АМИТ «Ховар»/. Дар деҳаи Бобосафоли Ҷамоати деҳоти Гулшани ноҳияи Фархор аз ҷониби Дирексияи сохтмонии назди Ҳукумати Ҷумҳурии Тоҷикистон муассисаи таҳсилоти миёнаи умумии №28 бунёд гардида, айни ҳол корҳои сохтмонӣ дар мактаб пурра ба анҷом расида, тибқи нақша моҳи марти соли оянда ба истифода дода мешавад.

Тавре дар мақомоти иҷроияи ҳокимияти давлатии вилояти Хатлон ба АМИТ «Ховар» хабар доданд, 27 декабр Раиси вилоят Қурбон Ҳакимзода бо гурӯҳи ҳамроҳонаш ба ноҳияи Фархор сафар карда, нахуст бо ҷараёни корҳои сохтмонӣ дар ин муассисаи таълимӣ шинос гардиданд.

Иттилоъ дода шуд, ки муассисаи таҳсилоти миёнаи умумии №28 барои 640 хонанда дар ду баст пешбинӣ гардида, бо ба истифода додани ин мактаб мушкили нарасидани ҷойи нишаст барои хонандагон дар деҳаи мазкур бартараф мегардад.

Қурбон Ҳакимзода ба масъулин барои сабзазоркунии атрофи мактаб ва сари вақт анҷом додани корҳои боқимондаи сохтмонӣ дастуру супориш дод.

АКС: Мақомоти иҷроияи ҳокимияти давлатии вилояти Хатлон