Навраси тоҷик Темурҷон Абдураҳмонов дар Ҷоми кушоди VIII кишварҳои ИДМ оид ба таэквондо ҷойи аввалро ишғол намуд

ДУШАНБЕ, 15.12.2022 /АМИТ «Ховар»/. Хонандаи синфи 8-и Литсейи филиали Донишгоҳи давлатии Москва ба номи М.В. Ломоносов дар шаҳри Душанбе Темурҷон Абдураҳмонов дар Ҷоми кушоди VIII кишварҳои ИДМ оид ба таэквондо- Ҷоми ҷаҳонии таэквондо ITF ҷойи аввалро ишғол намуд. Дар ин бора АМИТ «Ховар» бо истинод ба донишгоҳи мазкур иттилоъ медиҳад.

Мусобиқа аз 8 то 12 декабр дар пойтахти Беларус- шаҳри Минск баргузор гардид.

14 декабр Директори иҷроияи филиали Донишгоҳи давлатии Москва ба номи М.В. Ломоносов дар шаҳри Душанбе Рустам Ғаниев зимни ҳамоиши тантанавӣ ба чемпиони ҷавон ифтихорнома ва мукофоти пулӣ такдим намуд.

Инчунин волидони навраси ғолиб Темурҷон Абдураҳмонов низ барои тарбия ва дастгирии фарзандашон бо Сипоснома қадрдонӣ гардиданд.

АКС: Донишгоҳи давлатии Москва ба номи М.В. Ломоносов дар шаҳри Душанбе