Пекин маҳдудияти вобаста ба ковидро сабуктар намуд: дар корхонаҳо ва мағозаҳо нишон додани санҷиш барои COVID-19 дигар зарур нест

ДУШАНБЕ, 07.12.2022 /АМИТ «Ховар»/. Ба мардуми пойтахти Чин иҷозат дода шуд, ки ба боғҳо, мағозаҳои тиҷоратӣ, корхонаҳо, метро ва фурудгоҳҳо бидуни нишон додани натиҷаи манфии санҷиши COVID-19 ворид шаванд, ки ин аз сабук гардидани маҳдудият вобаста ба ковид дар кишвар дарак медиҳад. Дар ин бора АМИТ «Ховар» бо истинод ба хабаргузории Reuters иттилоъ медиҳад.

«Пекин аз нав ба ҳаёт омода мешавад», — мавод бо чунин сарлавҳа дар рӯзномаи ҷамъиятию сиёсии Чин China Daily ба нашр расид.

Reuters инчунин зикр мекунад, ки метавонад сабуксозии минбаъдаи чораҳои зиддиковидӣ ба амал ояд. Мувофиқи иттилои манбаъҳои агентӣ, Чин метавонад 7 декабр 10 чораи нави миллӣ оид ба сабуккуниро эълон кунад, ки ба мубориза бо COVID-19 нигаронида шудаанд.

«Давраи душвортарин паси сар шуд»,- омадааст дар шарҳи агентии иттилоотии «Синхуа», ки шоми 5 декабр нашр шуда буд. Дар мавод зикр гардидааст, ки суст шудани таъсири вирус ба амал омадааст. Илова бар ин, дар мубориза бо вирус эмкунии 90 фоизи аҳолӣ нақши калон бозидааст.

«Самти умумии бозгашт ба ҳаёти муқаррарӣ аллакай хеле равшан аст ва барои барқарор кардани иқтисод баргардонидани ҳаракати озодонаи мардум дар музофот зарур аст», — навиштааст дар саҳифаи худ рӯзноманигори чинӣ Ху Ситсзин.

Таҳлилгарон пешгӯӣ мекунанд, ки Чин метавонад аз нав иқтисоди худро ба роҳ монад ва назорати сарҳадро барвақттар лағв кунад. Баъзеҳо пешгӯӣ мекунанд, ки ҶМЧ дар баҳор пурра сарҳадҳояшро боз мекунад.

Барои сармоягузорон ин хабар рӯҳбаландкунанда аст, зеро он метавонад ба қувват гирифтани дуввумин иқтисоди бузург дар ҷаҳон мусоидат кунад ва барои рушди ҷаҳонӣ ҳавасманд намояд. Юан аз оғози моҳи ноябр тибқи интизориҳои эҳёи эҳтимолии иқтисоди Чин тақрибан 5% нисбат ба доллар афзоиш ёфтааст.

Азиза ДАДАБОЕВА
АМИТ «Ховар»

АКС: unsplash.com