СММ аз толибон даъват намуд амрҳоеро, ки ҳуқуқи занонро поймол мекунанд, бекор намоянд

ДУШАНБЕ, 28.12.2022 /АМИТ «Ховар»/. Комиссари олии СММ оид ба ҳуқуқи инсон Фолкер Тюрк мақомоти кунунии Афғонистонро дубора даъват намуд, ки фавран ҳамаи фармонҳоеро, ки ба поймолкунии ҳуқуқҳои занон равона шудаанд, аз ҷумла фармони чанде қабл баровардаашонро, ки дар ташкилоти ғайридавлатӣ кор кардани  занонро манъ менамояд, бекор кунанд. Ӯ ҳушдор дод, ки ин гуна тасмимҳо сабаби «силсилаи оқибатҳои ногувор» барои ҳаёти занон гардида, тамоми ҷомеаи Афғонистонро зери хатари нооромӣ қарор медиҳанд. Дар ин бора АМИТ «Ховар» бо истинод ба Хадамоти хабарии СММ иттилоъ медиҳад.

«Ягон кишвар наметавонад аз ҷиҳати иҷтимоӣ ва иқтисодӣ бидуни мавҷудияти як қисмати аҳолияш рушд ва зиндагӣ намояд. Маҳдудияти ғайричашмдошт нисбат ба занону духтарон на танҳо боиси ранҷу азобҳои бештар барои тамоми афғонҳо мешавад, балки дар берун аз Афғонистон низ метавонад ба оқибатҳои хатарнок табдил ёбад»,- гуфт Фолкер Тюрк.

«Ман аз ҳукумати кунунии ин кишвар даъват менамоям, ки риоя ва ҳифзи ҳуқуқҳои ҳамаи занону духтаронро таъмин кунад  — онҳо ҳуқуқ доранд, ки овозашон шунида шавад, [дар ҳаёти ҷомеа] иштирок кунанд ва тибқи уҳдадориҳои байналмилалии Афғонистон, дар ҳамаи ҷанбаҳои ҳаёти иҷтимоӣ, сиёсӣ ва иқтисодии мамлакат саҳми худро гузоранд»,-изҳор намуд ҳимоякунандаи асосии ҳуқуқи инсон дар СММ.

24 декабр мақомоти кунунии Афғонистон фармоне содир карданд, ки занонро аз кор дар созмонҳои ғайридавлатӣ манъ мекунад. Қабл аз ин толибон таҳсили занон дар донишгоҳҳои Афғонистонро манъ карда буданд.

Рӯзи шанбе Дабири кулли СММ Антониу Гутерриш гуфт, ки аз гузоришҳо дар бораи фармони нави мақомоти Афғонистон «амиқан нигарон» аст. Ӯ ёдовар шуд, ки ҳамаи занҳо ҳуқуқи кор кардан доранд.

Шаҳлои САДРИДДИН,
АМИТ «Ховар»

АКС: Миссияи СММ/ Ф. Поя