Аз моҳи декабр дар Чин бар асари COVID-19 тақрибан 60 000 нафар фавтиданд

ДУШАНБЕ, 16.01.2023 /АМИТ «Ховар»/. Дар Чин як моҳ баъд аз оғози манъи сиёсати “таҳаммулпазирии сифрӣ” 59 938 нафар бар асари коронавирус фавтиданд. Тавре АМИТ «Ховар» бо истинод ба агентии Reuters иттилоъ медиҳад, дар ин бора намояндаи Комиссияи миллии тандурустӣ (NHC) Тсзяо Яҳуи хабар додааст.

Маълумот давраи аз 8 декабр то 12 январро дар бар мегиранд. 5 503 нафар дар натиҷаи заъфи шуши марбут ба Ковид-19 фавтида, 54 435 фавт аз дигар бемориҳои марбут ба COVID-19 ба қайд гирифта шудаанд.

Синни миёнаи фавтидагон 80,3 солро ташкил дода, аз ҳар даҳ нафари фавтида 9 нафарашон аз 65-сола боло буданд. Шумораи фавт миёни пиронсолон бо сабаби шиддат гирифтани бемориҳои дилу рагҳо байни пиронсолон дар фасли зимистон ва афзоиши бемориҳои роҳҳои нафас нисбатан зиёд гардидааст,-шарҳ дод Тсзяо Яҳуи.

Комиссияи миллии тандурустии кишвар хабар додааст, ки ҳамаи ин фавтҳо дар бемористонҳо сабт шудаанд. Эҳтимол дорад, ки дар хонаҳо низ фавтидагон бошанд.

АКС аз манбаъҳои боз