Россия ва Эрон метавонанд ба ҳисоббаробаркуниҳо бо арзи маҷозӣ (криптовалюта) гузаранд

ДУШАНБЕ, 17.01.2023 /АМИТ «Ховар»/.  Бонки марказии Эрон имконияти интиқоли ҳисоббаробаркуниҳои савдои хориҷӣ бо Россия тавассути арзи маҷозӣ (криптовалюта) баррасӣ мекунад. Тавре АМИТ «Ховар» хабар медиҳад, дар ин бора «Ведомости»  бо истинод ба Директори иҷроияи Ассотсиатсияи Россия оид ба криптоиндустрия ва блокчейн Александр Бражников иттилоъ медиҳад.

Ба гуфтаи ӯ, асъор бо тилло таъмин хоҳад шуд, яъне гап дар бораи таъсиси ба истилоҳ стейблкоин меравад. Ба нақша гирифтаанд, ки онро ба ҷои доллар, рубл ва риёли эронӣ ҳамчун воситаи пардохт истифода баранд.

Бражников ҳамчунин ёдовар шуд, ки имсол минтақаи махсуси иқтисодии Астрахан ба қабули бор аз Эрон шурӯъ хоҳад кард. Ин ҳолат метавонад ёрдами хубе барои ҷорӣ намудани ҳисоббаробаркуниҳои арзи маҷозӣ гардад.

Музокирот миёни Россия ва Эронро узви кумитаи сиёсати иттилоотӣ, технологияҳои иттилоотӣ ва алоқаи Думаи Россия Антон Ткачёв низ тасдиқ кард.

Ӯ афзуд, ки пули рақамӣ нисбат ба системаи SWIFT бартарӣ дорад, аммо ин ташаббус дар сатҳи давлатӣ замоне баррасӣ хоҳад шуд, ки дар Россия истифодаи арзи маҷозиро иҷозат диҳанд.

Зикр мешавад, ки Эрон дар ин замина кишвари хеле пешрафта аст: аввалин фармоиши воридоти мол бо арзи маҷозӣ моҳи августи соли 2022 ба қайд гирифта шуда буд. Ҳамчунин ба ин кишвар тақрибан 5% истихроҷи пули рақамии ҷаҳонӣ рост меояд.

Шаҳлои САДРИДДИН,
АМИТ «Ховар»,

АКС аз сомонаи telmenews.ru