Федератсияи дзюдои Тоҷикистон саҳифаҳои худро дар шабакаҳои иҷтимоӣ дубора фаъол кард

ДУШАНБЕ, 03.01.2023 /АМИТ «Ховар»/. Федератсияи дзюдои Тоҷикистон (ФДТ) аз дубора фаъол намудани саҳифаҳои расмии худ дар шабакаҳои иҷтимоии Фейсбук — (Tajikistan Judo Federation), Инстаграм – (tajikjudo) ва Ютуб — (tajikjudo) хабар дод. 

Тавре ба АМИТ «Ховар» дар Федератсияи дзюдои Тоҷикистон иттилоъ доданд, вақтҳои охир дар  шабакаҳои иҷтимоӣ аз номи Федератсия хабарҳо дар бораи кушодани саҳифа ва паҳн намудани маълумоти нопурра ва бардурӯғ ба чашм мерасанд.

«Ба маълумоти ҳаводорон ва мухлисони дзюдо мерасонем, ки саҳифаҳои расмии Федератсияи дзюдои  Тоҷикистон дар Инстаграм бо номи TAJIKJUDO, дар Фейсбук  бо номи TAJIKISTAN JUDO FEDERATION ва дар Ютуб TAJIKJUDO  фаъолият мекунанд», — таъкид намуданд дар Федератсияи дзюдои Тоҷикистон.

Дар ФДТ зикр намуданд, ки маълумоти бештар ва хабарҳои расмиро мухлисон ва ВАО метавонанд инчунин аз сомонаи расмии Федератсия дар суроғаи www.judo.tj дастрас намоянд.

АКС: Федератсияи дзюдои Тоҷикистон