Имрӯз дар Душанбе Чемпионати Тоҷикистон оид ба гӯштин оғоз мегардад

ДУШАНБЕ, 28.01.2023. /АМИТ «Ховар»/. Имрӯз дар Қасри теннис ва маҷмааи варзиши обии пойтахт Чемпионати Ҷумҳурии Тоҷикистон- 2023 оид ба гӯштин (тарзи озод ва юнони — румӣ) байни калонсолон баргузор мегардад, хабар доданд ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон.

Дар рӯзи аввали чемпионат  қувваозмоиҳо байни гӯштингирони тарзи озод доир мегардад. Рўзи дигар, 29 январ барои дарёфти мақомҳои ифтихорӣ гўштингирони тарзи юнонӣ -румӣ ба майдон мебароянд.

Чемпионати мазкур дар доираи «Тақвими ягонаи чорабиниҳои оммавию варзишӣ ва солимгардонӣ» баргузор мегардад. Ғолибон ва беҳтарин гўштигирони чемпионат имкони шомил шудан ба дастаи  миллии Тоҷикистонро пайдо менамоянд.

Дар ин мусобиқа  барандаи медали нуқраи Бозиҳои олимпии соли 2008 оид ба гўштини тарзи озод дар ҳайати дастаи мунтахаби Тоҷикистон, собиқ мураббии дастаҳои мунтахаби Полша ва Руминия Юсуф Абдусаломов, ки барои роҳбарии мусобиқаи ҷумҳуриявӣ дар Душанбе қарор дорад, ба ҳайси меҳмон иштирок менамояд.

АКС аз манбаъҳои боз