СОЛИ НАВИ ЧИНӢ. Дар Чин дар робита ба Ҷашни баҳор талотуми анъанавӣ оғоз гардид

ДУШАНБЕ, 10.01.2023 /АМИТ «Ховар»/. Дар Чин ташвишҳои анъанавӣ ба муносибати фарорасии ҷашни баҳор (Чунтзе, Соли нави чинӣ) оғоз ёфтанд. Тавре АМИТ «Ховар» хабар медиҳад, дар ин бора нашрияи англисизабони чинӣ Global Times иттилоъ додааст.

Аз 7 январ муҳоҷирати мавсимии аҳолии Чин, ки бо ҷашни баҳор алоқаманд аст оғоз ёфт. Муҳоҷират тўли 40 рӯз идома меёбад.

Ба гуфтаи коршиносон, дар ин муддат тақрибан 2 миллиард сафар анҷом дода мешавад, ки ин назар ба соли 2022 тақрибан ду баробар зиёд аст.

Дар ин миён, аз 8 январ Чин ба марҳилаи нави вокуниш ба COVID-19 ворид шуда, барои мубориза бо бемориҳои сироятии қатори В чораҳо андешида  мешаванд. Дар ин рӯз расман барасмиятдарории гумрукӣ дар чанд бандар аз нав фаъол шуд ва гардишгарии фаромарзӣ, ки се сол боз мутаваққиф шуда буд, дубора ифтитоҳ ёфт. Ин бо афзоиши ҷустуҷӯ ва фармоиши парвозҳову меҳмонхонаҳо, инчунин интизории бошавқу завқи сайёҳони чинӣ дар бисёр кишварҳо ҳамроҳ буд. Дар Чин бо такмил додани пайвастаи чораҳои пешгирӣ ва мубориза бо эпидемия, одамон дар вақтҳои охир аллакай тағйироти возеҳро эҳсос кардаанд — дар кӯчаҳо рафтуои мошинҳои зиёд, шумораи бештари одамон дар тарабхонаҳо, майдончаҳои бозӣ ва бозорҳои истеъмолии саросари кишвар ба чашм мерасанд.

Соли нави чинӣ барои ин мардум муҳимтарин ҷашн аст, ки беш аз ду ҳазор сол боз таҷлил карда мешавад. Соли навбатӣ тибқи тақвими чинӣ 22 январ оғоз гардида, онро то 5 феврал  таҷлил  хоҳанд кард.

Шаҳлои САДРИДДИН,
АМИТ «Ховар»

АКС: Unsplash