Ваколатдор оид ба ҳуқуқи инсон ҳодисаҳои фоҷиабори зери ях мондани ноболиғонро аз беназоратии волидон медонад

Январь 25, 2023 14:54

ДУШАНБЕ, 25.01.2023 /АМИТ «Ховар»/. Мақомоти Ваколатдор оид ба ҳуқуқи инсон дар Ҷумҳурии Тоҷикистон бинобар ҳодисаҳои фоҷиабори зери ях мондани ноболиғон дар шаҳри Ҳисор ва ноҳияи Муъминобод, ки сабаби марги 4 кўдаки хурдсол гардидаанд, изҳори нигаронӣ намуда, сабаби онро беназоратии падару модар ва шахсони ивазкунандаи онҳо медонад. Дар ин бора ба АМИТ «Ховар» дар мақомоти Ваколатдор оид ба ҳуқуқи инсон дар Ҷумҳурии Тоҷикистон хабар доданд. 

Дар изҳороти мақомоти мазкур, аз ҷумла омадааст, ки “ҳуқуқи кўдак ба ҳаёт, эҳтироми шаъну эътибори инсонӣ ва дахлнопазирии шахсӣ, озод будан аз тамоми шаклҳои зўроварӣ ҳуқуқи бунёдии кўдакон ба шумор рафта, андешидани тадбирҳои зарурии қонунгузорӣ, маъмурӣ, иҷтимоӣ ва маърифатиро талаб менамояд”.

Новобаста аз тадбирҳои андешидашаванда, ҳолатҳои алоҳидаи фавт ва ҷароҳат бардоштани кўдакон аз беназоратӣ, ки давоми моҳи равон ба вуқўъ омаданд, ташвишовар боқӣ мемонанд.

«Ҳодисаҳои фоҷеабори зери ях мондани ноболиғон дар шаҳри Ҳисор ва ноҳияи Муъминобод, ки сабаби марги 4 кўдаки хурдсол гардидаанд, боиси нигаронии амиқи мақомоти давлатӣ ва аҳли ҷомеа буда, тадбирҳои таъхирнопазирро дар самти ҳифзи ҳуқуқ ва таъмини манфиатҳои беҳтарини кўдакон тақозо менамоянд.

Таҳлилу омўзиши ҳодисаҳои нохуш, ки сабаби марги кўдакон гардидаанд, нишон медиҳад, ки дар аксар ҳолатҳо кўдакон бе назорати падару модар ва шахсони ивазкунандаи онҳо дар ҷойҳои ба ҳаёт ва саломатиашон хатарнок гашту гузор мекунанд»,-омадааст дар изҳорот.

Фарқ нагузоштан миёни муҳит барои калонсолон ва хурдсолон, шакл нагирифтани муҳити муҳофизаткунанда ва бетафовутӣ ба тарбияву назорати кўдакон дар ҷомеа метавонад оқибатҳои манфӣ ба бор оварад.

Дар Тоҷикистон модару кўдак таҳти ҳимоя ва ғамхории махсуси давлат қарор дошта, кўдакон дар сиёсати инсонпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷойгоҳи хосса бархурдоранд. Дар ин замина давлат ва Ҳукумати Ҷумҳурии Тоҷикистон низ пайваста тадбир меандешанд.

Бояд гуфт, ки масъалаи дигаре, ки таваҷҷуҳи махсус талаб менамояд, мушкилоти кўдакони муҳоҷирони меҳнатист, ки ҳам падар ва ҳам модарашон ба муҳоҷирати меҳнатӣ рафта, бе назардошти расмиёти қонунгузорӣ кўдакони хурдсоли худро дар тарбияи хешу табор мегузоранд. Дар натиҷа кўдакон метавонанд бо таъминоти иҷтимоӣ, тарбия, таълим ва назорати дуруст фаро гирифта нашаванд.

Назорати кўдакон махсусан дар шароити кўҳистон, дар ҷойҳои наздик ба роҳҳои мошингард, ҳавзу дарёҳо диққати махсус талаб менамояд. Дар ин ҳолатҳо бояд падару модар ва аҳли ҷомеа масъулият ҳис намуда, назорати ҷиддӣ баранд.

«Аз ин лиҳоз, Ваколатдор оид ба ҳуқуқи инсон ҷиҳати таъмини ҳифзи ҳуқуқу озодиҳо ва таъмини манфиатҳои беҳтарини кўдакон аз мақомот, муассисаву ташкилот, падару модарон ва аҳли ҷомеа даъват ба амал меорад, ки дар шаклгирии муҳити муҳофизаткунанда барои кўдакон тадбир андешида, барои боз ҳам баланд бардоштани маърифати ҳуқуқии аҳолӣ дар  самти ҳифз, тарбия, таълим, назорат ва рушди кўдакон корҳои фаҳмондадиҳиро тақвият бахшанд»,-омадааст дар изҳорот.

Тавре қаблан АМИТ «Ховар» хабар дода буд, се кӯдаки хурдсол, сокинони деҳаи Ғарабдараи Ҷамоати деҳоти Балхобии ноҳияи Муъминободи вилояти Хатлон ҳангоми лижаронӣ дар болои яхи обанбори сунъӣ ба об афтодаанд. Ҳамзамон  ҳангоми гузаштан аз дарёи Хонақоҳ, ки ях баста буд, як хоҳар ва бародари 16 ва 7 – сола, сокинони деҳаи Гачаки Ҷамоати деҳоти Деҳқонободи шаҳри Ҳисор ба зери ях фурӯ рафтаанд. Бо талоши ҳамсояҳо писарбача аз  марг наҷот дода шуд.

Вобаста ба ин ҳодиса  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон  аз шаҳрвандон хоҳиш намуд, ки фарзандони худро беназорат нагузоранд ва ба онҳо зарурати риояи қоидаҳои бехатариро фаҳмонанд.

Шаҳлои САДРИДДИН,
АМИТ «Ховар»

АКС: АМИТ «Ховар»

Январь 25, 2023 14:54

Хабарҳои дигари ин бахш

«Паём — ҳуҷҷати раҳнамо дар фаъолияти минбаъдаи ҳар як сокини Тоҷикистон»,- бардошт аз вохӯрӣ бо сокинони ноҳияи Абдураҳмони Ҷомӣ
Дар Душанбе масъалаи татбиқи Саҳмҳои Муайяншудаи Миллӣ ва таҳияи нақшаи маблағгузории иқлим дар Тоҷикистон баррасӣ карда шуд
Дар ҷаласаи Шӯрои ҷамъиятӣ Паёми Президенти Тоҷикистон ба Маҷлиси Олии Ҷумҳурии Тоҷикистон тавзеҳ дода шуд
Истеъмоли аз ҳад зиёди равғани зард боиси дилбеҳузурии 48 нафар сокинони ноҳияи Шамсиддини Шоҳин шуд
ВАҲШОНИЯТИ ТОЛИБОН*. Низоме, ки зан-модарро таҳқир мекунад ва бо рафтори ҷоҳилонааш тамаддуни башариро аз байн мебарад, мубтало ба фаност
Хадамоти алоқаи Тоҷикистон барои беҳтар намудани сифати хизматрасонии алоқаи мобилӣ ва интернет тадбир меандешад
ПЕШГӮИИ АГЕНТИИ ОБУҲАВОШИНОСӢ: Дар Тоҷикистон рӯзҳои охири моҳи январ ҳавои тағйирёбандаи бебориш мешавад
ТАЪМИНИ АМНИЯТИ МАФКУРАВӢ-АСОСИ СУБОТИ ҶОМЕА. Андешаҳои узви КМИР Махфират Хидирзода дар ҳошияи Паёми Президенти Тоҷикистон ба Маҷлиси Олии Ҷумҳурии Тоҷикистон
Дар Тоҷикистон Озмуни ҷумҳуриявии мақолаи беҳтарин оид ба ҳифзи пиряхҳо баргузор карда мешавад
«СОЛИ 2023-СОЛИ ҲИФЗИ МЕҲНАТ». 25 январ дар Тоҷикистон Рӯзи кормандони соҳаи меҳнат ва ҳифзи иҷтимоии аҳолӣ таҷлил карда мешавад
Дар натиҷаи сангрезӣ дар Рӯшон се манзили истиқоматии сокинон хароб гардидааст
Дар Тоҷикистон бо мақсади баланд бардоштани ҳисси ватандӯстии ҷавонон озмун баргузор карда мешавад